বিগত দুটাকৈ বছৰতকৈও অধিক সময় ধৰি বন্ধ হৈ ভাৰত-ভূটান সীমান্তৰ গেট সমূহ পৰ্যটকৰ বাবে পুনৰ মুকলি কৰা হৈছে। অসমৰ সীমামূৰীয়া কেইবাটাও স্থানত চুবুৰীয়া ৰাষ্ট্ৰখনৰ সৈতে সংযোগ ঘটা সীমান্ত গেট আছে।
তামুলপুৰ জিলাৰ চামদ্ৰুপ-জংখাৰ, চিৰাঙৰ দাদগিৰি আৰু গেলেফু, বাক্সাৰ নামলাং আৰু পাংবাং আৰু ওদালগুৰি জিলাৰ চামৰাঙত থকা আন্তঃৰাষ্ট্ৰীয় সীমান্ত গেটসমূহ পুনৰ মুকলি কৰা হৈছে বুলি গুৱাহাটী ভ্ৰমণৰত ভূটানৰ কনচুল জেনেৰেল জিগমে থিনলি নামগিয়ালে উল্লেখ কৰিছে।
ক’ভিদ মহামাৰী আৰম্ভ হোৱাৰ পিছৰে পৰা এই গেটসমূহ বন্ধ হৈ আছিল। শুকুৰবাৰে কিছুমান নতুন নিয়মৰ সংযোজন ঘটাই গেটসমূহ পুনৰ মুকলি কৰা হয়।
পৰ্যটকৰ সুবিধাৰ বাবে গেটসমূহ পুৱা ৯ বজাৰ পৰা সন্ধিয়া ৫ বজালৈ খোলা থাকিব। শুকুৰবাৰে গেটসমূহ পুনৰ মুকলিৰ সময়ত বহু দৰ্শনাৰ্থী সমবেত হয়। দুয়োখন দেশৰ বহু লোকেও শুভেচ্ছা বিনিময় কৰে।
উল্লেখ্য যে ভূটান চৰকাৰে ইয়াৰ পূৰ্বে ২৩ ছেপ্টেম্বৰৰ পৰা ব্যৱসায়িক সংযোগ তথা পৰিবহনৰ বাবে দেশখনৰ সীমান্ত পুনৰ মুকলি কৰাৰ কথা ঘোষণা কৰিছিল।
ভাৰত, বাংলাদেশ আৰু মালদ্বীপৰ পৰ্যটকসকলৰ পৰা প্ৰতিদিনে ১২,০০০ টকাৰ এক বহনক্ষম উন্নয়ন মাচুল আদায় কৰা হ’ব বুলি ইতিমধ্যে ভূটান প্ৰশাসনে সদৰী কৰিছিল।
