অৰুণাচল প্ৰদেশ, নাগালেণ্ডত বিতৰ্কিত ’আফস্পা’ৰ ম্যাদ পুনৰ ছমাহলৈ বৃদ্ধি
অৰুণাচল প্ৰদেশ আৰু নাগালেণ্ডত বিতৰ্কিত সেনা বাহিনীৰ বিশেষ ক্ষমতা আইনৰ ম্যাদ পুনৰ ছমাহলৈ বৃদ্ধি কৰা হৈছে। শনিবাৰৰ পৰা সেই অঞ্চলবোৰত সেনাৰ বিশেষ ক্ষমতা বৃদ্ধি কৰা হৈছে বুলি চৰকাৰী সূত্ৰই প্ৰকাশ কৰিছে।
অৰুণাচল প্ৰদেশৰ টিন জিলাত আফস্পা ছয় মাহলৈ বৃদ্ধি কৰা হৈছে। ফলস্বৰূপে, তিৰাপ, চাংলাং আৰু লংডিং জিলাত সেনাৰ বিশেষ ক্ষমতা অব্যাহত থাকিব।
নামচাই জিলাৰ মহাদেৱপুৰ আৰু নামচাই আৰক্ষী থানা অঞ্চলক ‘অশান্ত’ বুলি ঘোষণা কৰি বিতৰ্কিত আইনখনৰ ম্যাদ বৃদ্ধি কৰা হৈছে। অহা বছৰৰ ১ অক্টোবৰৰ পৰা ৩০ মাৰ্চলৈ এই অঞ্চলসমূহত আফস্পা কাৰ্যকৰী কৰা হৈছে। শেহতীয়াকৈ গৃহ মন্ত্ৰালয়ে জাৰি কৰা এক বিবৃতিত এইবুলি কোৱা হৈছে যে নাগালেণ্ডৰ নখন ‘অশান্ত’ জিলা আৰু ১৬ খন আৰক্ষী থানা অঞ্চলত আফস্পাৰ ম্যাদ বৃদ্ধি কৰা হৈছে।
নাগা বিচ্ছিন্নতাবাদী গোট এনএছচিএন (আইএম)ৰ সৈতে শান্তি প্ৰক্ৰিয়া মাজভাগত স্থবিৰ হৈ পৰিছে। সংগঠনটোৰ আলোচনা বিৰোধী খাপলাং গোট এতিয়াও সক্ৰিয় হৈ আছে। ফলস্বৰূপে, অঞ্চলটোত যিকোনো ধৰণৰ অস্থিৰতা দূৰ কৰিবলৈ এই সিদ্ধান্ত লোৱা হৈছে।
যোৱা বছৰ ডিচেম্বৰৰ আৰম্ভণিতে সন্ত্ৰাসবাদীৰ সন্দেহত সেনাই ১৩ জন নাগৰিকক গুলীয়াই হত্যা কৰাৰ পিছৰে পৰা নাগালেণ্ডত আফস্পা প্ৰত্যাহাৰৰ দাবী তীব্ৰতৰ হৈ পৰিছিল। স্থানীয় মানৱ অধিকাৰ সংগঠনে ইয়াৰ বিৰুদ্ধে প্ৰতিবাদ সাৱস্ত্য কৰিছিল। নাগালেণ্ড আৰু মণিপুৰ চৰকাৰেও কেন্দ্ৰক বিতৰ্কিত আইনখন প্ৰত্যাহাৰ কৰিবলৈ আহ্বান জনাই আহিছে।
বহু বিতৰ্কিত সশস্ত্ৰ বাহিনী (বিশেষ) ক্ষমতা আইন বাতিলৰ বাবে নাগালেণ্ডকে ধৰি উত্তৰ-পূৰ্বাঞ্চলৰ কেইবা খনো ৰাজ্যই দাবী জনাই অহাৰ মাজতে কেন্দ্ৰীয় গৃহ দপ্তৰে অলপতে পুনৰ নাগালেণ্ডত ছমাহৰ বাবে বৃদ্ধি কৰিছে সশস্ত্ৰ বাহিনী (বিশেষ) ক্ষমতা আইনৰ সময়সীমা।
সশস্ত্ৰ বাহিনী (বিশেষ) ক্ষমতা আইনে সামৰিক বাহিনীক “সন্ত্ৰাস বিধ্বস্ত এলেকা” বুলি ঘোষণা কৰা যিকোনো স্থানত মুক্তভাৱে কাম কৰাৰ ব্যাপক ক্ষমতা প্ৰদান কৰি আহিছে।
এই আইনৰ অচিলালৈয়ে শেহতীয়াকৈ ৪ ডিচেম্বৰত নাগালেণ্ডত সেনাৰ পেৰা স্পেচিয়েল ফ’ৰ্চে ১৩ জন নাগৰিকক হত্যা কৰিছিল। যি ঘটনাই সমগ্ৰ দেশজুৰি প্ৰতিক্ৰিয়াৰ সৃষ্টি কৰিছিল। লগে লগে পুনৰ সজোৰে উত্থাপন হৈছিল সশস্ত্ৰ বাহিনী (বিশেষ) ক্ষমতা আইন বাতিলৰ দাবী।
নাগালেণ্ডৰ মুখ্যমন্ত্ৰী নেইফিউ ৰিঅ’ই গৃহমন্ত্ৰী অমিত শ্বাহৰ সৈতে কৰা আলোচনাৰ অন্তত নাগালেণ্ডৰ পৰা বিতৰ্কিত সশস্ত্ৰ বাহিনী বিশেষ ক্ষমতা আইন ১৯৫৮, চমুকৈ আফস্পা বাতিলৰ আশ্বাস দিছিল গৃহমন্ত্ৰীগৰাকীয়ে।
