দেশৰ বিভিন্ন প্ৰান্তত বিৰোধী দলৰ নেতা-কৰ্মীসকলৰ বিৰুদ্ধে অভিযান চলাৰ সময়তে এইবাৰ আৰক্ষীৰ ৰোষত পৰিছে কেন্দ্ৰত শাসনাধিষ্ঠ বিজেপি দলৰ এগৰাকী কৰ্প’ৰেট।
সোমবাৰে তেলেংগানাৰ নালগোণ্ডা জিলাৰ চেলমেদা চেক-পোষ্টত বিজেপিৰ এই কৰ্প’ৰেট গৰাকীৰ বাহনৰ পৰা এক কোটি টকা জব্দ কৰে আৰক্ষীয়ে।
বাহন পৰীক্ষাৰ সময়ত আৰক্ষীয়ে বিজেপি কৰ্পোৰেটৰ গৰাকীৰ গাড়ীৰ পৰা ১ কোটি টকাৰ এই হিচাপ বিহীন এই বৃহৎ ধন ৰাশি জব্দ কৰে। উল্লেখ্য যে অহা ৩ নৱেম্বৰত নালগোণ্ডাৰ মুনুগোডেত উপনিৰ্বাচন অনুষ্ঠিত হ’ব।
উপনিৰ্বাচনৰ প্ৰাকমুহূৰ্তত এই বৃহৎ ধনৰাশিৰ উদ্ধাৰে চাঞ্চল্যৰ সৃষ্টি কৰিছে। ৰাজ্যখনৰ শাসকীয় ভাৰত ৰাষ্ট্ৰ সমিতিয়ে এই ধনৰাশি বিজেপিয়ে ভোটাৰৰ মন আকৃষ্ট কৰিবলৈ ব্যৱহাৰ কৰাৰ বাবে কঢ়িওৱা হৈছিল বুলি অভিযোগ কৰিছে।
ইফালে নালগোণ্ডাৰ আৰক্ষী অধীক্ষকগৰাকীয়ে জানিবলৈ দিয়া মতে, আৰক্ষীৰ এটা দলে সোমবাৰে আবেলি নিয়মীয়া বাহন পৰীক্ষাৰ সময়ত এখন টাটা চাফাৰী ৰখাইছিল। গাড়ীখন বেণু নামৰ এগৰাকী বিজেপি কৰ্প’ৰেটে চলাই আছিল আহিছিল বুলি তেওঁ উল্লেখ কৰে।
আৰক্ষীৰ দলটোৱে তেওঁৰ বাহনখন পৰীক্ষা কৰাৰ অৰ্থে গাড়ীখনৰ ডিকী খুলিবলৈ আহ্বান জনায়। ডিকীত পৰীক্ষা কৰাৰ সময়তে আৰক্ষীয়ে ১ কোটি টকা নগদ ধন ভৰ্তি এটা মোনা উদ্ধাৰ কৰে।
এই বৃহৎ ধনৰাশি সন্দৰ্ভত আৰক্ষীয়ে জেৰা কৰাৰ পাছতো বিজেপি কৰ্প’ৰেটৰ গৰাকীয়ে কোনো কোনো সন্তোষজনক উত্তৰ দিয়াত বিফল হোৱাৰ লগতে ধনৰ উৎস প্ৰমাণ কৰিবলৈ কোনো নথি-পত্ৰ দেখুওৱাত বিফল হয়।
ইতিমধ্যে আৰক্ষীয়ে এই সন্দৰ্ভত এক গোচৰ ৰুজু কৰিছে। জিলা আৰক্ষী অধীক্ষক গৰাকীয়ে গোচৰ সন্দৰ্ভত তদন্ত চলাই থকা হৈছে বুলি সংবাদ মাধ্যমৰ আগত অৱগত কৰে।
