দেশত ‘নীলা বিপ্লৱ’ৰ সূচনাৰ বাবে প্ৰধানমন্ত্ৰী মোদীৰ বৰ্ষপুৰণি ঘোষণাৰ অধীনত অৰুণাচল প্ৰদেশত শীঘ্ৰেই নিৰ্মাণ কৰা হ’ব উত্তৰ-পূব ভাৰতৰ প্ৰথমটো মাছ সংগ্ৰহালয়। ৰাজ্যখনৰ মীন মন্ত্ৰী টেজ টাকীয়ে এই কথা সদৰী কৰিছে।
এই মৎস্য সংগ্ৰহালয়টো কেন্দ্ৰীয় মীন মন্ত্ৰালয়ৰ দ্বাৰা অনুমোদিত ইণ্টিগ্ৰেটেড একুৱা পাৰ্কৰ (আইএপি) অংশ হ’ব বুলি তেওঁ জানিবলৈ দিছে।
মন্ত্ৰীগৰাকীয়ে উল্লেখ কৰা মতে ৰাজ্যখনৰ বুলা গাঁৱত অৱস্থিত বৰ্তমানৰ টেৰিন ফিছ ফাৰ্ম (টিএফএফ)ক ইণ্টিগ্ৰেটেড একুৱা পাৰ্ক হিচাপে উন্নীত কৰা হ’ব।
ইণ্টিগ্ৰেটেড একুৱা পাৰ্ক হিচাপে উন্নীত স্থানতে মৎস্য সংগ্ৰহালয়টো নিৰ্মাণ কৰা হ’ব বুলি তেওঁ লগতে কয়।
সংগ্ৰহালয়টোত ৰাজ্যখনৰ সকলো প্ৰকাৰৰ মাছৰ প্ৰজাতি থাকিব আৰু মীন পালনৰ বাবে প্ৰশিক্ষণ কেন্দ্ৰ হিচাপেও গঢ়ি তোলা হ’ব।
মীন মন্ত্ৰী টেজ টাকীয়ে এই সন্দৰ্ভত কয়, “তিনি বছৰ পূৰ্বে প্ৰধানমন্ত্ৰী নৰেন্দ্ৰ মোদীয়ে নীলা বিপ্লৱ অনাৰ বাবে প্ৰধানমন্ত্ৰী মৎস্য সম্পদ যোজনাৰ (পিএমএমএছৱাই) অধীনত প্ৰতিখন ৰাজ্য আৰু কেন্দ্ৰীয় শাসিত অঞ্চলৰ বাবে এটাকৈ ইণ্টিগ্ৰেটেড একুৱা পাৰ্ক ঘোষণা কৰিছিল।”
এই পৰিকল্পনাৰ অধীনত প্ৰস্তাৱিত প্ৰকল্পটোৰ বাবে বিশেষজ্ঞসকলৰ নিৰ্দেশনা বিচাৰি হায়দৰাবাদস্থিত ৰাষ্ট্ৰীয় মীন পালন উন্নয়ন ব’ৰ্ডলৈ দুবাৰকৈ ভ্ৰমণ কৰিছিল বুলিও মন্ত্ৰীগৰাকীয়ে লগতে কয়।
আনুমানিক ১০০ কোটি টকাৰ প্ৰস্তাৱিত প্ৰকল্পটোৰ বাবে চলিত বিত্তীয় বৰ্ষত প্ৰথম কিস্তি হিচাপে ৪৩.৫৯ কোটি টকা মঞ্জুৰ কৰা হৈছিল বুলি তেওঁ লগতে জানিবলৈ দিয়ে।
