উৰিষ্যাৰ গঞ্জাম জিলাত দেওবাৰে বনৰীয়া গাহৰিৰ সন্ত্ৰাসে তীব্ৰ আতংকৰ সৃষ্টি কৰে। বনৰীয়া গাহৰিৰ ভয়াৱহ আক্ৰমণত এগৰাকী ৬২ বছৰীয়া মহিলা নিহত হোৱাৰ লগতে গুৰুতৰভাৱে আহত হৈছে আন ছয়গৰাকী লোক।
এই ঘটনা সংঘটিত হৈছে গঞ্জাম জিলাৰ ৰামপল্লী নামৰ এখন গাঁৱত। স্থানীয় ৰামপল্লী, বেৰুয়াবাদী আৰু মাৰুদি গাঁৱৰ লোকসকলে খেতিপথাৰত কাম কৰি থকাৰ সময়তে বনৰীয়া গাহৰিৰ জাকে ভয়াৱহ আক্ৰমণ চলায়।
এই ভয়াৱহ আক্ৰমণত সাতগৰাকী লোক গুৰুতৰভাৱে আহত হয়। ইয়াৰে ভাৰতী স্বাইন নামৰ মহিলাগৰাকীৰ আঘাত অধিক গুৰুতৰ হোৱাৰ বাবে স্থানীয় কোডালা কমিউনিটি হেল্থ চেণ্টাৰত চিকিৎসাধীন অৱস্থাতে মৃত্যু হয়।
আনহাতে আঘাতপ্ৰাপ্ত আনসকল লোকক পিছত বঢ়মপুৰৰ চিকিৎসা চিকিৎসালয়লৈ প্ৰেৰণ কৰা হয়। তেওঁলোকৰে দুগৰাকীৰ অৱস্থা গুৰুতৰ বুলি জানিবলৈ দিছে ঘুমুচাৰ দক্ষিণৰ বিভাগীয় বন বিষয়া (ডিএফঅ’) দিলীপ কুমাৰ ৰাউতে।
ৰামপল্লী গাঁৱৰ এগৰাকী স্থানীয় লোকে সংবাদ মাধ্যমৰ আগত উল্লেখ কৰা মতে বনৰীয়া গাহৰিৰ আক্ৰমণত এনে ভয়াৱহ পৰিস্থিতিৰ উদ্ভৱ হোৱাৰ লগতে কেইবা একৰ মাটিৰ শস্যও ধ্বংস হয়।
ইফালে অঞ্চলটোত বনৰীয়া গাহৰিৰ অবাধ প্ৰৱেশ নিয়ন্ত্ৰণৰ বাবে ৩০ গৰাকী বন কৰ্মী মোতায়েন কৰা হৈছে বুলি বিভাগীয় বন বিষয়া (ডিএফঅ’) দিলীপ কুমাৰ ৰাউতে জানিবলৈ দিছে।
