পুনৰ অশান্ত হৈ পৰিছে পঞ্জাৱ। বৃহস্পতিবাৰে পঞ্জাৱৰ ফৰিদকোটত ডেৰা চাচা ছৌদাৰ এজন অনুগামীক দুৰ্বৃত্তই গুলীয়াই হত্যা কৰাৰ পিছতে ডেৰা চাচা ছৌদাৰ অনুগামীসকলৰ মনত ক্ষোভৰ সৃষ্টি হৈছে। এই হত্যাকাণ্ডৰ পিছতে ডেৰা প্ৰধান গুৰমিত ৰাম ৰহিম সিঙৰ অনুগামীসকলে ৰাজ্যখনৰ বিভিন্ন প্ৰান্তত প্ৰতিবাদ আৰম্ভ কৰিছে।
পঞ্জাৱৰ মুখ্যমন্ত্ৰী ভগৱন্ত মানে আৰক্ষীক পৰিস্থিতিত নিয়ন্ত্ৰণ কৰিবলৈ কঠোৰ নিৰ্দেশ দিছে। আৰক্ষীয়ে জনোৱা মতে বৃহস্পতিবাৰে পুৱা ফৰিদকোটৰ কোটকাপুৰাত পাঁচজন সশস্ত্ৰ লোকে প্ৰদীপ সিং ওৰফে দোধি নামৰ এজন স্থানীয় ডেৰা নেতাক গুলীয়াই হত্যা কৰে।
লোকজনৰ বিৰুদ্ধে শিখসকলৰ ধৰ্মগ্ৰন্থ চুৰি কৰাৰ অভিযোগ আছিল। প্ৰদীপ নামৰ এজন ব্যৱসায়ীয়ে বৃহস্পতিবাৰে পুৱা তেওঁৰ দোকান খুলিবলৈ যোৱাৰ সময়তে পাঁচজনীয়া দলটোৱে তেওঁক লক্ষ্য কৰি গুলীচলনা কৰে।
ঘটনাটোৰ পিছত অঞ্চলটোত উত্তেজনা বিয়পি পৰে আৰু বিভিন্ন ঠাইত অতিৰিক্ত আৰক্ষী বাহিনী মোতায়েন কৰা হৈছে। ইপিনে ঘটনাটোৰ পিছতে ৰাজ্য খনৰ মুখ্যমন্ত্ৰী ভগৱন্ত মানে টুইটত কয় “পঞ্জাৱ এখন শান্তিপ্ৰিয় ৰাজ্ম। ৰাজ্য খনত মানুহৰ পাৰস্পৰিক ভাতৃত্ববোধ অতি শক্তিশালী।
কাকো পঞ্জাৱত শান্তি বিঘ্নিত কৰাৰ সুযোগ দিয়া নহ’ব। ৰাজ্যখনত শান্তি আৰু আইন-শৃংখলা বজাই ৰাখিবলৈ প্ৰশাসন আৰু আৰক্ষী বিষয়াসকলক কঠোৰ নিৰ্দেশনা দিয়া হৈছে। ” উল্লেখ্য কিছুদিন পূৰ্বেও ৰাজ্য খনত এগৰাকী শিৱসেনাৰ নেতাক গুলীয়াই হত্যা কৰা হৈছিল। আৰক্ষীয়ে অৱশ্যে শিৱসেনাৰ নেতাজনৰ হত্যাকাৰীক লগে লগে গ্ৰেপ্তাৰ কৰিবলৈ সক্ষম হৈছিল।
