মালদ্বীপত ভয়াৱহ অগ্নিকাণ্ডত ৯ জন ভাৰতীয়সহ নিহত ১০ জন লোক

বৃহস্পতিবাৰে মালদ্বীপৰ ৰাজধানী মালেত বিদেশী শ্ৰমিকৰ বাসগৃহত সংঘটিত ভয়াৱহ অগ্নিকাণ্ডৰ ফলত কমেও ১০ জন লোক নিহত আৰু কেইবাজনো লোক আহত হয়। অগ্নি নিৰ্বাপক সেৱাৰ বিষয়াসকলে বাতৰিটো সদৰী কৰে। বিষয়াসকলে কয় যে জুইত ধ্বংস হোৱা এটা ঘৰৰ ওপৰৰ মহলাৰ পৰা ১০টা মৃতদেহ উদ্ধাৰ কৰা হৈছে। ঘৰটোৰ তলৰ মহলাত থকা এটা গাড়ী মেৰামতি কৰা গেৰেজৰ পৰা জুইৰ সূত্ৰপাত হৈছিল।

এজন নিৰাপত্তা বিষয়াই জনোৱা অনুসৰি মৃতসকলৰ ভিতৰত ৯ জন ভাৰতীয় আৰু এজন বাংলাদেশী নাগৰিক আছে। এই দ্বীপপুঞ্জৰ ৰাজধানীখন বিশ্বৰ বহুলোকৰ ছুটী কটোৱাৰ আদৰ্শ স্থান হিচাপে পৰিচিত। অঞ্চলটো পৃথিৱীৰ আটাইতকৈ ঘন বসতিপূৰ্ণ চহৰসমূহৰ ভিতৰত অন্যতম।

মালদ্বীপত থকা ভাৰতীয় উচ্চায়োগে ভাৰতীয় নাগৰিক আৰু অন্যান্যসকলে প্ৰাণ হেৰুৱা মালেত সংঘটিত শোকাৱহ অগ্নিকাণ্ডৰ ঘটনাত শোক প্ৰকাশ কৰিছে।

মালদ্বীপৰ ৰাজনৈতিক দলসমূহে বিদেশী শ্ৰমিকসকলৰ অৱস্থাক সমালোচনা কৰিছে। বিদেশী শ্ৰমিকসকল মালেৰ আঢ়ৈ লাখ জনসংখ্যাৰ প্ৰায় আধা আৰু বেছিভাগ বাংলাদেশ, ভাৰত, নেপাল, পাকিস্তান আৰু শ্ৰীলংকাৰ বাসিন্দা।

We are deeply saddened by the tragic fire incident in Malé which has caused loss of lives, including reportedly of Indian nationals.

We are in close contact with the Maldivian authorities.

For any assistance, HCI can be reached on following numbers:
+9607361452 ; +9607790701

— India in Maldives (@HCIMaldives) November 10, 2022

কোভিড-১৯ মহামাৰীৰ যেতিয়া স্থানীয় লোকৰ তুলনাত বিদেশী শ্ৰমিকৰ মাজত তিনিগুণ দ্ৰুতগতিত সংক্ৰমণ বিয়পি পৰিছিল সেইসময়তে তেওঁলোকৰ দৰিদ্ৰ জীৱন ধাৰণৰ পৰিস্থিতি উন্মোচিত হৈ পৰিছিল।