ন বছৰীয়া শিশুক বৰ্বৰ অত্যাচাৰ দুৰ্বৃত্তৰ: সামাজিক মাধ্যমত ভাইৰেল ভিডিঅ’, অভিযুক্তক গ্ৰেপ্তাৰ; চাওক ভিডিঅ’

পথৰ কাষত ৰৈ আছে এটি কন্যা শিশু। হঠাতে এগৰাকী ব্যক্তিয়ে শিশুটিক ওপৰলৈ ডাঙি লৈছে আৰু জোৰেৰে মাটিত দলিয়াই দিছে। তাৰ পিছতে ভাৱলেশহীনভাৱে আঁতৰি গৈছে দুৰ্বত্তগৰাকী আৰু মাটিত পৰি যোৱা হাতৰ কিতাপসমূহ পুনৰ বুটলি লৈছে শিশুটিয়ে।

সম্প্ৰতি সামাজিক মাধ্যমত এই দৃশ্যটো ভাইৰেল হৈ পৰিছে। এই বৰ্বৰ কাণ্ড সংঘটিত হৈছে কেৰালাৰ কাচাৰাগোডত। বৃহস্পতিবাৰে পুৱা কাচাৰাগোডৰ মঞ্জেশ্বৰত এটি ন বছৰীয়া শিশুৰ ওপৰত এনে অমানুষিক অত্যাচাৰ চলায় এক দুৰ্বৃত্তই।

ঘটনা সন্দৰ্ভত আৰক্ষীয়ে জানিবলৈ দিয়া মতে, বৃহস্পতিবাৰে পুৱা কন্যা শিশুটিয়ে মাদ্ৰাছাৰ বাহিৰত খুৰাকৰ বাবে অপেক্ষা কৰি থকাৰ সময়তে আবুবেকাৰ ছিদ্দিক নামৰ এগৰাকী স্থানীয় লোকে শিশুটিক এনে বৰ্বৰোচিত আক্ৰমণ কৰে।

শিশুটি ঘৰত উপস্থিত হৈ অভিভাৱকক এই ঘটনাৰ বিষয়ে অৱগত কৰাৰ পিছতে অভিভাৱকসকল বিদ্যালয়ত উপস্থিত হয় আৰু বিদ্যালয়খনৰ চিচিটিভি ফুটেজ পৰীক্ষা কৰে। তেতিয়াই এই নৃশংস কাণ্ড পোহৰলৈ আহে।

In a shocking incident, a 9-year-old girl was thrown away by a man in #Kerala‘s Kasargod. The incident was captured on CCTV. #Shocking #NewsMo pic.twitter.com/8KvDes5fGo

— IndiaToday (@IndiaToday) November 17, 2022

এই ঘটনাৰ দৃশ্য সামাজিক মাধ্যমত ভাইৰেল হৈ পৰাৰ পিছত সৃষ্টি হোৱা বিতৰ্ক আৰু শিশুটিৰ অভিভাৱকৰ অভিযোগৰ পিছতে আৰক্ষীয়ে অভিযুক্ত আবুবেকাৰ ছিদ্দিকক গ্ৰেপ্তাৰ কৰে।

স্থানীয় এগৰাকী আৰক্ষী বিষয়াই জানিবলৈ দিয়া মতে অভিযুক্ত ছিদ্দিকৰ বিৰুদ্ধে ভাৰতীয় দণ্ডবিধিৰ ধাৰা ৩০৭ আৰু যৌন অপৰাধৰ পৰা শিশুৰ সুৰক্ষা (POCSO) আইনৰ ধাৰাৰ অধীনত এক গোচৰ ৰুজু কৰা হৈছে।

বৰ্বৰতাৰ সন্মুখীন হোৱা শিশুটিৰ শৰীৰত বাহ্যিকভাৱে কোনো আঘাতৰ চিন নাই যদিও বিতং স্বাস্থ্য পৰীক্ষাৰ বাবে মাংগালোৰৰ এখন চিকিৎসালয়লৈ লৈ যোৱা হয় বুলি আৰক্ষী বিষয়াগৰাকীয়ে লগতে কয়।