বিশিষ্ট চিন্তাবিদ, সাহিত্যিক, সাংবাদিক ড০ শিৱনাথ বৰ্মনৰ দেহাৱসান ঘটিছে। বৃহস্পতিবাৰে সন্ধিয়া মহানগৰীৰ নেমকেয়াৰ হাস্পাতালত শেষ নিশ্বাস ত্যাগ কৰে বৰ্ষীয়ান চিন্তাবিদগৰাকীয়ে। মৃত্যুৰ সময়ত তেওঁৰ বয়স হৈছিল ৮০ বছৰ।
বিশিষ্ট চিন্তাবিদগৰাকী দীৰ্ঘদিন ধৰি বৃক্কৰ ৰোগত ভূগি আছিল। লগতে তেওঁ হৃদৰোগ, হাঁওফাঁওৰ ৰোগ আৰু উচ্চ ৰক্তচাপতো ভুগি আছিল।
১৯৪২ চনত যোৰহাটত জন্মগ্ৰহণ কৰা প্ৰয়াত ড০ বৰ্মনৰ পিতৃ আছিল নলবাৰীৰ পশ্চিম চামতাৰ আমনিৰ বাসিন্দা। ড০ বৰ্মনে নাজিৰাত তেওঁৰ স্কুলীয়া শিক্ষা সম্পূৰ্ণ কৰিছিল।
তেওঁ ১৯৬৩ চনত পদাৰ্থ বিজ্ঞানত স্নাতক আৰু গুৱাহাটী বিশ্ববিদ্যালয়ৰ পৰা স্নাতকোত্তৰ ডিগ্ৰী লাভ কৰে। ২০০২ চনত আৰ্য মহাবিদ্যালয়ৰ পদাৰ্থ বিজ্ঞানৰ অধ্যাপকপদৰ পৰা অৱসৰ গ্ৰহণ কৰে।
ড০ বৰ্মনে ‘জীবন পৰিক্ৰমা’, ‘শ্ৰীমন্ত শংকৰদেৱ: কৃতি আৰু কৃতিত্ব’, ‘অসমৰ জনজাতি’, ‘সংস্কৃতিৰ সংকট’, ‘অসমীয়া জীৱনী অভিধান’কে ধৰি অলেখ গ্ৰন্থৰে অসমীয়া সাহিত্য জগতলৈ অসামান্য অৱদান আগবঢ়াই থৈ গৈছে।
ড০ শিৱনাথ বৰ্মন দৈনিক ‘জনসাধৰণ’ বাতৰি কাকতৰ মুখ্য সম্পাদকো আছিল।
