সমগ্ৰ দেশ প্ৰায় বিধ্বস্ত হৈ পৰিছে। মৃত্যুৰ সংখ্যা ৪,০০০ অতিক্ৰম কৰিছে। তুৰ্কীত ক্ৰমে তিনিটাকৈ হোৱা ভূমিকম্পই ক্ষতিৰ পৰিমাণ বৃদ্ধি কৰিছে। মৃত্যুৰ সংখ্যা কিমানলৈ যাব তাৰ সীমা নিৰ্দ্ধাৰণ কৰিব পৰা হোৱা নাই। ইপিনে, তুৰ্কীৰ ৰাষ্ট্ৰপতি এৰোদয়ানে দেশবাসীক কৈছে যে তেওঁলোকে অধিক মৃত্যুৰ বাতৰিৰ বাবে অপেক্ষা কৰিব লাগিব। তাৰমাজতে শেহতীয়াকৈ এটা টুইট ভাইৰেল হৈ পৰিছে। সেই টুইটটো হৈছে গৱেষক ফ্ৰেংক হুগাৰবিটছৰ।
যোৱা ৩ ফেব্ৰুৱাৰীত গৱেষক ফ্ৰেংক হুগাৰবিটছৰ দ্বাৰা পোষ্ট কৰা এটা টুইটে ভূমিকম্পৰ আগতীয়া সতৰ্কবাণী প্ৰকাশ কৰিছিল। তেওঁ লিখিছিল, “অতি শীঘ্ৰে বা পিছত এটা ভয়ংকৰ ভূমিকম্প হ’ব পাৰে। তাত তেওঁ কম্পনৰ পৰিমাণৰ ইংগিতও দিছিল। আৰু সেই মাত্ৰা আছিল ৰিখটাৰ স্কেলত ৭.৫।
উল্লেখ্য যে সোমবাৰে প্ৰথমবাৰৰ বাবে চিৰিয়া আৰু তুৰস্কৰ এক বৃহৎ অংশত ৭.৯ মাত্ৰাৰ ভূমিকম্প হৈছিল। দ্বিতীয় ভূমিকম্পৰ প্ৰাবল্য আছিল ৭.৫ আৰু তৃতীয়টো ভূমিকম্পৰ ৰিখটাৰ স্কেলত কম্পনৰ প্ৰাবল্য আছিল ৬। ফ্ৰেংক হুগাৰবিটছৰ টুইটটো বৰ্তমান ভাইৰেল হৈ আছে।
টুইটযোগে তেওঁ লগতে লিখি দিছিল যে কোন কোন দেশত এই ভয়ংকৰ ভূমিকম্পৰ সম্ভাৱনা আছে। সেই তালিকাত আছিল চিৰিয়া, তুৰস্ক, জৰ্ডান আৰু লেবানন।
Sooner or later there will be a ~M 7.5 #earthquake in this region (South-Central Turkey, Jordan, Syria, Lebanon). #deprem pic.twitter.com/6CcSnjJmCV
— Frank Hoogerbeets (@hogrbe) February 3, 2023
সোমবাৰে পুৱতি নিশা তুৰস্কৰ গাজিয়ানটেপৰ ওচৰত ভূমিকম্পৰ কেন্দ্ৰস্থল ধৰা পৰিছিল। চিৰিয়াৰ সৈতে তুৰ্কীৰ সীমান্তৰ এটা ডাঙৰ অংশ ভূমিকম্পৰ দ্বাৰা ক্ষতিগ্ৰস্ত হৈছিল। শেহতীয়া প্ৰতিবেদন অনুসৰি তুৰস্ক আৰু চিৰিয়াত ভূমিকম্পৰ ফলত মৃত্যুৰ সংখ্যা ৪,০০০ ৰ সীমা অতিক্ৰম কৰিছে।
ইফালে, ছ’চিয়েল মিডিয়াত একাধিক ভিডিঅ’ ক্ৰমান্বয়ে ভাইৰেল হৈ পৰিছে। এটা ভিডিঅ’ত আনকি দেখা গৈছে যে এজন সাংবাদিকে প্ৰথম ভূমিকম্পৰ বাতৰি পোনপটীয়াকৈ সম্প্ৰচাৰ কৰাৰ সময়তে দ্বিতীয়টো ভূমিকম্পৰ কবলত পৰিছিল।
ইয়াৰ উপৰিও, কিছুমান ঠাইত ঘৰ খহি পৰা, কিছুমান ঠাইত জুই লগাৰ ঘটনা সংঘটিত হৈছিল। এই পৰিস্থিতিবোৰ চিৰিয়া আৰু তুৰস্কৰ বিভিন্ন প্ৰান্তৰ পৰা আহিছে।
এই ভূমিকম্পৰ ৰূপ কিমান ভয়ংকৰ আছিল সেয়া ছ’চিয়েল মিডিয়াত শ্বেয়াৰ কৰা ভিডিঅ’চ দেখা গৈছে। ইফালে, বিশ্বৰ বিভিন্ন দেশে এই দুৰ্যোগৰ সময়ত সহায়ৰ হাত আগবঢ়াইছে। পৃথিৱীৰ মুঠ ৪২ খন দেশ সহায়ৰ বাবে আগবাঢ়ি আহিছে। পুৰণি শত্ৰুতা পাহৰি ইজৰাইলেও সহায় কৰিবলৈ আগবাঢ়ি আহিছে। ভাৰতে উদ্ধাৰ অভিযানৰ বাবে এনডিআৰএফৰ এটা বিশেষ দল প্ৰেৰণ কৰাৰ সিদ্ধান্ত লৈছে।
