হাইস্কুল শিক্ষান্ত পৰীক্ষাৰ বিজ্ঞান বিষয়ক প্ৰশ্ন কাকত ফাদিলৰ ঘটনাত এতিয়ালৈকে মুঠ ২২জনক আটক কৰা হৈছে। ৰাজ্যজুৰি শৈক্ষিক মহলত সৃষ্টি হোৱা প্ৰতিক্ৰিয়াৰ মাজতে এই ২২জনক আটক কৰা হৈছে। প্ৰশ্নকাকত ফাদিলৰ ঘটনাৰ চিআইডি তদন্ত আৰম্ভ হোৱাৰ সময়তে এইদৰে ৰাজ্যৰ বিভিন্ন প্ৰান্তৰ পৰা লোকসকলক আটক কৰা হৈছে।
আৰক্ষীয়ে আটক কৰাসকলৰ ভিতৰত অধিকাংশই শিক্ষাৰ্থী। আটক কৰা সকলৰ ভিতৰত লখিমপুৰত ৫ জন, ধেমাজিৰ পৰা ১ জন, ডিব্ৰুগড়ৰ পৰা ৫ জন আৰু শদিয়া, তিনিচুকীয়াৰ পৰা বাকী কেইজন শিক্ষাৰ্থীক আটক কৰা হৈছে। বাতৰি অনুসৰি, এই শিক্ষাৰ্থীসকলে হোৱাটছএপৰ জৰিয়তে প্ৰশ্ন কাকত লাভ কৰিছিল।
আনহাতে, সোমবাৰে চিআইডিয়ে মহানগৰীৰ কাহিলিপাৰাৰ ভাউৰী দেৱী ছাৰাউগী মুকবধিৰ বিদ্যালয়ৰ পৰীক্ষা নিয়ন্ত্ৰক, বিষয় শিক্ষক আৰু কৰ্মচাৰীকে ধৰি মুঠ ৩ জনক সোধপোছ চলায়। ভাউৰী দেৱী ছাৰাউগী মুকবধিৰ বিদ্যালয়ৰ পৰা পৰীক্ষাৰ পূৰ্বেই এটা প্ৰশ্ন কাকতৰ টোপোলা হেৰাইছিল। চিআইডিয়ে প্ৰাথমিক তদন্তত বিদ্যালয়খনৰ পৰীক্ষা নিয়ন্ত্ৰক জ্যোতিৰেখা বৰগোহাঁই আৰু শিক্ষক, কৰ্মচাৰী ক্ৰমে হেৰম্ব কুমাৰ দাস আৰু বিন্দেশ্বৰ তিমুঙক আটক কৰিছিল।
ইপিনে, প্ৰশ্ন কাকত ফাদিল সন্দৰ্ভত চিআইডিয়ে সোমবাৰে ছেবাৰ মুখ্য পৰীক্ষা নিয়ন্ত্ৰক জিমলি কাকতি শইকীয়া আৰু পৰীক্ষা নিয়ন্ত্ৰক নয়ন জ্যোতি শৰ্মাকো তলব কৰিছিল। প্ৰশ্ন কাকত ফাদিল সন্দৰ্ভত পৰীক্ষা নিয়ন্ত্ৰক নয়ন জ্যোতি শৰ্মাই আৰক্ষীৰ ওচৰত এক গোচৰ দাখিল কৰিছিল যদিও সেই গোচৰ অসম আৰক্ষীয়ে চিআইডিলৈ হস্তান্তৰ কৰিছে।
