পৰ্ণ তাৰকা ষ্টৰ্মি ডেনিয়েলছক যৌন সম্পৰ্কৰ বিষয়ে মুখ নুখুলিবলৈ উৎকোচ দিয়াৰ অভিযোগ উত্থাপন হৈছিল আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্পৰ বিৰুদ্ধে। ইয়াৰ পিছতে তেওঁক গ্ৰেপ্তাৰ কৰা হয়। বৰ্তমান তেওঁ জামিনত মুক্ত হৈ আছে। তাৰ মাজতে এইবাৰ আন এক নতুন অস্বস্তিত পৰিছে ড’নাল্ড ট্ৰাম্প।
পুনৰ ট্ৰাম্পৰ বিৰুদ্ধে উঠিছে ধৰ্ষণৰ অভিযোগ। এইবাৰ অভিযোগ কৰিলে আমেৰিকাৰ এগৰাকী বিশিষ্ট মহিলা প্ৰৱন্ধ লেখিকাই। শেহতীয়াকৈ আমেৰিকাৰ আদালতত এই গোচৰৰ শুনানি আৰম্ভ হৈছে।
ধৰ্ষণৰ পিছত প্ৰাক্তন ৰাষ্ট্ৰপতিগৰাকীয়েও তেওঁক উপহাস কৰিছিল বুলিও অভিযোগ উত্থাপন কৰিছে ভুক্তভোগী মহিলাগৰাকীয়ে।
সাংবাদিক তথা প্ৰৱন্ধকাৰ জিন কেৰলে ট্ৰাম্পৰ বিৰুদ্ধে ধৰ্ষণৰ অভিযোগ উত্থাপন কৰিছে। বৰ্তমান ৭৯ বছৰীয়া কেৰলে দাবী কৰিছে যে নব্বৈৰ দশকৰ মাজভাগত মানহাটানৰ এটা শ্বপিং মলত ট্ৰাম্পে তেওঁক যৌন নিৰ্যাতন চলাইছিল।
অভিযোগ অনুসৰি, সেই শ্বপিং মলৰ ট্ৰায়েল ৰুমত ট্ৰাম্পে কেৰলক ধৰ্ষণ কৰিছিল। কেৰলৰ অধিবক্তাই দাবী কৰে যে তেওঁৰ ক্লায়েণ্টে তেওঁক সংযত কৰিবলৈ চেষ্টা কৰিছিল যদিও আমেৰিকাৰ প্ৰাক্তন ৰাষ্ট্ৰপতিগৰাকীৰ শাৰীৰিক শক্তিৰ আগত নিজকে ৰক্ষা কৰিব পৰা নাছিল।
২০১৯ চনত কেৰলে প্ৰথমবাৰৰ বাবে নিউয়ৰ্কৰ এখন আলোচনীত এই বিষয়ে মুকলিকৈ কৈছিল। তাত তেওঁ দাবী কৰিছিল যে তেওঁ দীৰ্ঘদিন ধৰি ট্ৰাম্পৰ আৰ্থিক আৰু সামাজিক ক্ষমতাৰ ভয়তে মুকলিকৈ ক’বলৈ শংকিত হৈছিল।
অৱশ্যে ট্ৰাম্পৰ অধিবক্তাই এই সকলো অভিযোগ অস্বীকাৰ কৰে। তেওঁৰ মতে, কেৰলে ধন আৰু খ্যাতিৰ প্ৰতি লোভৰ বাবেই ট্ৰাম্পৰ বিৰুদ্ধে এই অভিযোগ উত্থাপন কৰিছে। এইদৰেই তেওঁ নিজৰ কিতাপৰ প্ৰচাৰ কৰিব বিচাৰিছে।
