এক লাখক নিযুক্তি আৰু আন্দোলন বৰ্জিত পৰিৱেশৰ শ্লোগান দি থকাৰ সময়তে আজি গুৱাহাটীৰ চচলত অস্থায়ী চিকিৎসা কৰ্মীসকলে উত্তাল প্ৰতিবাদ সাব্যস্ত কৰে।
ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে অস্থায়ী চিকিৎসা কৰ্মীসকলৰ আন্দোলনলৈ পূৰ্ণ সমৰ্থন দিয়াৰ লগতে তেওঁলোকৰ চাকৰি স্থায়ী কৰিবলৈ দাবী উত্থাপন কৰিছে। ৰাজ্যৰ চিকিৎসালয়সমূহত “চিকিৎসালয় পৰিচালনা সমিতি”ৰ অধীনত সহস্ৰাধিক যুৱক-যুৱতীয়ে অতি কম দৰমহাত সেৱা আগবঢ়াই আহিছে।
প্ৰাপ্ত খবৰ মতে এনে কৰ্মচাৰীয়ে মাহে মাত্ৰ এক হাজাৰৰ পৰা চাৰি হাজাৰ টকা দৰমহা পায়। এই সামান্য দৰমহাৰে কৰ্মচাৰীসকলৰ পৰিয়ালসমূহ কিমান কষ্টৰ মাজত চলিবলগীয়া হৈছে সেয়া সহজে অনুমেয়। চৰকাৰী অনুষ্ঠানত কেনেদৰে শ্ৰম আইন উলংঘা হৈছে এই ঘটনা তাৰ স্পষ্ট প্ৰমাণ। বছৰি এক লাখ নিবনুৱাক চাকৰি দিম বুলি দম্ভ মাৰি থকা চৰকাৰৰ অধীনত কিমান সংখ্যক লোক চৰম অনিশ্চয়তা আৰু নগণ্য দৰমহাত কাম কৰিবলগীয়া হৈছে তাৰ সীমা সংখ্যা নাই। স্বাভাৱিকতে এনে শ্ৰমিকসকল ক্ষুব্ধ হৈ পৰিছে আৰু আন্দোলনৰ পথ বাচি লৈছে। এই গণতান্ত্ৰিক আন্দোলনক সন্মান জনাই চৰকাৰে শীঘ্ৰেই দাবী মানি লোৱা উচিত।
একে সময়তে সৰ্বশিক্ষাৰ অধীনৰ ২৫ হাজাৰ ঠিকাভিত্তিক শিক্ষক, ১৬ হাজাৰ কৰ্মচাৰী আৰু ১০ হাজাৰ ষ্টেট পুলৰ ঠিকাভিত্তিক শিক্ষকৰ দৰমহা সময় মতে আদায় দিয়া নাই। তেওঁলোকে কেতিয়ালৈ দৰমহা পাব সেয়া নিশ্চিত নহয়। এনে এক অনিশ্চয়তাৰ মাজত শিক্ষকসকলে শিক্ষাদান কাৰ্য চলাই যাবলগীয়া হৈছে। চৰকাৰৰ এই দায়িত্বহীন কাৰ্যত ডি ৱাই এফ আইয়ে উদ্বেগ প্ৰকাশ কৰিছে আৰু তৎকালেই প্ৰাপ্য দৰমহা আদায় দিবলৈ দাবী জনাইছে।
ৰাজ্যৰ অৰ্থনৈতিক অৱস্থা শক্তিশালী বুলি দাবী কৰা ড° হিমন্ত বিশ্ব শৰ্মা নেতৃত্বাধীন চৰকাৰে ঠিকাভিত্তিক শিক্ষকৰ দৰমহা আদায় দিব নোৱাৰাতো অতি পৰিতাপৰ বিষয়। চৰকাৰে এফালে আন্দোলন বৰ্জিত পৰিৱেশৰ শ্লোগান দিছে আৰু অসমক পাঁচখন উন্নত ৰাজ্যৰ স্থানত উপনিত কৰাৰ সপোন দেখুৱাইছে, কিন্তু অস্থায়ী চিকিৎসা কৰ্মীৰ চাকৰিৰ সমস্যা আৰু ঠিকাভিত্তিক শিক্ষক-কৰ্মচাৰীৰ সমস্যা সমাধান নকৰাকৈ বিজেপি চৰকাৰে দেখুৱা সপোন যে বাস্তৱত পৰিণত নহয় সেয়া নিশ্চিত।
সেয়ে ডি ৱাই এফ আইয়ে দাবী কৰিছে অস্থায়ী চিকিৎসা কৰ্মীৰ চাকৰি স্থায়ী কৰক আৰু ঠিকাভিত্তিক শিক্ষক-কৰ্মচাৰীৰ দৰমহা সময়মতে আদায় দিয়ক।
