গ্ৰেপ্তাৰ হ’ল জোনমণি ৰাভাৰ বাহনত খুন্দিওৱা ট্ৰাক চালক সুমিত কুমাৰ পল। জানিব পৰা মতে সুমিত কুমাৰৰ ঘৰ উত্তৰ প্ৰদেশত।
সুমিত কুমাৰ পলে আৰক্ষীক জনোৱা মতে সুমিত কুমাৰে ঘন্টাত ৫০ কিলোমিটাৰ বেগেৰে ট্ৰাকখন চলাই আহি থকাৰ বিপৰীতে তীব্ৰগতিত আহিছিল জোনমণিৰ বাহনখন।
ঘটনাৰ দুদিন পিছত আজি জখলাবন্ধা আৰক্ষীৰ আগত আত্মসমৰ্পণ কৰাৰ পিছতেই সুনিতক কৰা হৈছে গ্ৰেপ্তাৰ।
ঘটনাৰ প্ৰথম প্রত্যক্ষদৰ্শী বুলি দাবী কৰা প্ৰণৱ দাসৰ ভাষ্যৰ লগত কোনো মিল নাই দুৰ্ঘটনা সংঘটিত কৰা ট্ৰাকখনৰ চালকজনৰ।
ইফালে প্ৰত্যক্ষদৰ্শী বুলি দাবী কৰা প্ৰণৱ দাসৰ লগতে নগাঁৱৰ আৰক্ষী অধীক্ষক লীনা দলেক সোধাপোচা কৰিছে CID এ।
আনহাতে, জোনমণি মৃত্যুৰ ঘটনাক লৈ চলি থকা চৰ্চাৰ মাজতে মুখ্যমন্ত্ৰী হিমন্ত বিশ্ব শৰ্মাই মৃত জোনমণিৰ পৰিয়াল CID ৰ তদন্তত সন্তুষ্ট নহ’লে তদন্তৰ দায়িত্ব CBI লৈ গোচৰটো স্থানাত্তৰিত কৰা হ’ব বুলি মন্তব্য কৰিছে।
লক্ষণীয়ভাৱে দুৰ্ঘটনা স্থলীত উপস্থিত হোৱা আৰক্ষীৰ বাহনখন চামুগুৰিৰ আৰক্ষী থানাৰ আছিল বুলি জানিব পৰা গৈছে। চামুগুৰিৰ আৰক্ষী থানাৰ বাহন ঘটনাস্থলীত কিয় উপস্থিত হৈছিল, সেই লৈও এতিয়া প্ৰশ্ন উত্থাপন হৈছে।
