গুৱাহাটীৰ শিলসাঁকো বিলত উচ্ছেদ অভিযানৰ ঘটনা সন্দৰ্ভত অসম মানৱ অধিকাৰ আয়োগে কামৰূপ মেট্ৰ’ জিলা প্ৰশাসনক দণ্ডাধীশ পৰ্যায়ৰ তদন্ত কৰিবলৈ নিৰ্দেশ দিছে।
এ এইচ আৰ চিৰ গোচৰ নং ৩ৰ ওপৰত ভিত্তি কৰি ২০২২/২৩ (৯)/৩ৰ ৪৬২৭ নম্বৰত কামৰূপ মেট্ৰ’ৰ জিলা উপায়ুক্তই অতিৰিক্ত জিলা দণ্ডাধীশ প্ৰিয়াংশু ভৰদ্বাজক উক্ত বিষয়টোৰ তদন্ত কৰি অহা সাত দিনৰ ভিতৰত এই তথ্যসমূহ মানৱ অধিকাৰ আয়োগৰ আগত দাখিল কৰাৰ দায়িত্ব অৰ্পণ কৰিছে।
ইয়াৰ উপৰিও কামৰূপৰ সহকাৰী আয়ুক্ত তথা কাৰ্যবাহী দণ্ডাধীশে ভাস্কৰ জ্যোতি কলিতাক তদন্তৰ কালছোৱাত প্ৰিয়াংশু ভৰদ্বাজক সহায় কৰিবলৈ নিৰ্দেশ দিছে।
উল্লেখ্য যে চলিত বৰ্ষৰ ফেব্ৰুৱাৰী মাহৰ আৰম্ভণিতে গুৱাহাটী মহানগৰ উন্নয়ন কৰ্তৃপক্ষই গুৱাহাটীৰ সংৰক্ষিত জলাশয় শিলসাঁকো বিলত উচ্ছেদ অভিযান আৰম্ভ কৰিছিল।
১৫খন এক্সকেভেটৰ আৰু ৩০০০ সশস্ত্ৰ জোৱানৰ দ্বাৰা এই উচ্চেদ অভিযান আৰম্ভ হয়।
এই অভিযানত ভিআইপি পথৰ চচল অঞ্চলৰ সমীপৰ শিকসাঁকো বিলত অবৈধভাৱে নিৰ্মাণ কৰা প্ৰায় ২৫০টা ঘৰ উচ্ছেদ কৰা হয়। চৰকাৰী খবৰ অনুসৰি শিলসাঁকো বিলত প্ৰায় ১৮০০ বিঘা মাটি আছে, ইয়াৰে ১২০০ বিঘা মাটি বেদখলকাৰীৰ কবলত।
ইয়াৰ পূৰ্বে সংবাদ মাধ্যমৰ আগত গুৱাহাটী মহানগৰ উন্নয়ন প্ৰাধিকৰণৰ অধ্যক্ষ নাৰায়ণ ডেকাই কয়, ‘শিলসাঁকোৰ মুঠ ১২০০ বিঘা মাটি বেদখলকাৰীৰ নিয়ন্ত্ৰণত আছে। এই সময়ত সকলোকে এবাৰতে উচ্ছেদ কৰাটো সম্ভৱ নহয়।’
