গুৱাহাটীৰ খাৰগুলি অঞ্চলত বৃহস্পতিবাৰে পানী যোগানৰ পাইপ ফাটি যোৱাৰ ফলত সৃষ্টি হোৱা জল বিস্ফোৰণ ঘটনাৰ তদন্তৰ বাবে তিনিজনীয়া এখন সমিতি গঠন কৰা হৈছে।
এই সন্দৰ্ভত অসমৰ গৃহ নিৰ্মাণ আৰু নগৰ পৰিক্ৰমা বিভাগে এক অধিসূচনা প্ৰকাশ কৰি তিনিজনীয়া পেনেলে ঘটনা সন্দৰ্ভত তদন্ত আৰম্ভ কৰিব বুলি উল্লেখ কৰিছে।
অসম চৰকাৰৰ সচিব প্ৰবিত্ৰ ৰাম খাউণ্ড নেতৃত্বাধীন উক্ত সমিতিখনত অসম চৰকাৰৰ অৱসৰপ্ৰাপ্ত সচিব ৰমেন্দ্ৰ সুন্দৰ চৌধুৰী আৰু জলসিঞ্চন বিভাগৰ অৱসৰপ্ৰাপ্ত মুখ্য অভিযন্তা সঞ্জয় কুমাৰ মহন্ত সদস্য হিচাপে থাকিব।
তদন্ত পেনেলৰ তথ্যৰ প্ৰতিবেদন দাখিল কৰিবলৈ তিনিদিনৰ সময় দিয়া হৈছে। উল্লেখ্য যে, এই বিস্ফোৰণৰ ফলত এগৰাকী মহিলাৰ মৃত্যু হোৱাৰ লগতে বহুকেইগৰাকী লোক আহত হৈছিল।
লগতে বহুকেইটা বাসগৃহৰ ক্ষতিসাধন হোৱাৰ উপৰিও পানীয়ে উটুৱাই নিছিল বহু বাহন। নতুনকৈ সংযোগ কৰা পাইপৰ জৰিয়তে পানী যোগান পৰীক্ষাৰ বাবে ভালভ খুলি দিয়াৰ সময়তে এই বিস্ফোৰণ ঘটে বুলি উল্লেখ কৰা হৈছিল।
কিন্তু প্ৰকাশিত এক সূত্ৰৰ মতে, পাইপত বিস্ফোৰণ ঘটা অংশটো নতুনকৈ সংযোগ কৰা হোৱা নাছিল। এই বিষয়ক কেন্দ্ৰ কৰি ক্ষোভিত হৈ পৰিছে ক্ষতিগ্ৰস্ত লোকসকল।
ইফালে, এই ঘটনাত নিহত মহিলাগৰাকীৰ পৰিয়াললৈ ২ লাখ টকাৰ অৰ্থসাহায্য ঘোষণা কৰিছে অসম চৰকাৰে। লগতে আহতসকললৈ ২০ হাজাৰকৈ টকা সাহায্য আগবঢ়োৱা বুলি মন্ত্ৰী যোগেন মোহনে ঘোষণা কৰিছে।
