পশ্চিম বংগৰ শিলিগুৰিত অনুষ্ঠিত হোৱা সপ্তম আম মহোৎসৱৰ প্ৰদৰ্শন কৰা হয় বিশ্ব ৰ আটাইকৈ দামী আম ‘মিয়াজাকি’।
জানিব পৰা মতে আন্তৰাষ্ট্ৰীয় বজাৰত ভাৰতীয় মূল্য অনুসৰি এই আমৰ মূল্য প্ৰতি কেজিত ২.৭৫ লাখ টকা।
শিলচৰ স্থানীয় সংবাদ মাধ্যমৰ বাতৰি অনুসৰি পশ্চিম বংগৰ বীৰভূমৰ কৃষক শৌকত হুছেইনে ১০টা মিয়াজাকি আম প্ৰদৰ্শন কৰি এই উৎসৱত অংশগ্ৰহণ কৰিছে।
৯ জুনত আৰম্ভ হোৱা এই উৎসৱ দেওবাৰ অৰ্থাৎ ১১ জুনলৈকে চলিব। মডেলা কেয়াৰটেকাৰ চেণ্টাৰ এণ্ড স্কুলৰ উদ্যোগত, এছ’চিয়েশ্যন ফৰ কনজাৰ্ভেচন এণ্ড টুৰিজিম সহযোগত শিলিগুৰিৰ এটা শ্বপিং মলত এই অনুষ্ঠান অনুষ্ঠিত হৈছে।
এই মহোৎসৱত ২৬২ৰো অধিক প্ৰজাতিৰ আম প্ৰদৰ্শন কৰা হ’ব।
উল্লেখ্য যে জাপানৰ কিউছু প্ৰিফেকচাৰৰ মিয়াজাকি চহৰত প্ৰথমে এই আমবিধৰ খেতি কৰা হৈছিল। সেয়ে মিয়াজাকি আমৰ নামটো ইয়াৰ উৎপত্তিস্থল চহৰখনৰ নামৰ পৰাই লোৱা হৈছে।
জাপানী ভাষাত Taiyo-no-Tamago নামেৰে জনাজাত এই আমবোৰৰ ওজন সাধাৰণ আমতকৈ ৩৫০ গ্ৰাম অধিক আৰু ইয়াত ১৫ শতাংশতকৈও অধিক পৰিমাণৰ চেনী থাকে।
ভাৰত আৰু দক্ষিণ-পূব এছিয়াত জনপ্ৰিয় সাধাৰণ আমৰ জাততকৈ ইয়াৰ ৰূপ আৰু ৰঙৰ পৃথক বাবেই এই আমবিধ অধিক জনপ্ৰিয়।
স্থানীয় প্ৰতিবেদন অনুসৰি এই মিয়াজাকি আমৰ উৎপাদন ৭০ৰ দশকৰ শেষৰ ফালে আৰু ৮০ৰ দশকৰ আৰম্ভণিতে মিয়াজাকিত আৰম্ভ হৈছিল। এই আমবোৰৰ এপ্ৰিলৰ পৰা আগষ্ট মাহৰ ভিতৰত খাব পৰা হয়।
এই আমবোৰত এন্টিঅক্সিডেন্ট প্ৰচুৰ পৰিমাণে থাকে আৰু ইয়াত বিটা-কেৰটিন আৰু ফলিক এচিড থাকে যিয়ে দৃষ্টিশক্তি বৃদ্ধি কৰাত সহায় কৰে।
ভাৰত, বাংলাদেশ, থাইলেণ্ড আৰু ফিলিপাইনছতো এই আমৰ খেতি কৰা হয়। খবৰ অনুসৰি মধ্যপ্ৰদেশৰ জবালপুৰ চহৰত এহাল দম্পতীৰ বাগিচাত এই ধৰণৰ আমৰ দুটা পুলি গজিছে ।
