এক নৃশংস হত্যাকাণ্ড সংঘটিত হৈছে গাজিয়াবাদত। ঘৰৰ পৰা গহনা চুৰি কৰাৰ সন্দেহ কৰি এহাল আত্মীয়ই অকথ্য নিৰ্যাতন চলাই হত্যা কৰিছে এগৰাকী ২৩ বছৰীয়া যুৱতীক। প্ৰকাশিত খবৰ অনুসৰি, চুৰি কাৰ্য কৰা বুলি স্বীকাৰোক্তি দিবলৈ যুৱতীগৰাকীক ব্লেড আৰু ৰডেৰে আক্ৰমণ কৰে দম্পতীহালে।
এই আক্ৰমণৰ সময়ত ভুক্তভোগী যুৱতীগৰাকীৰ চিৎকাৰ যাতে কাষৰ আন কোনো লোকে শুনিব নোৱাৰে তাৰ বাবে আনকি উচ্চ স্বৰত সংগীত বজাই লয় আক্ৰমণকাৰী দম্পতীহালে। এই পাশৱিক অত্যাচাৰত যুৱতীগৰাকীৰ মৃত্যুৰ পিছতে পলায়ন কৰে অভিযুক্তই।
ইফালে দুদিন ধৰি ঘৰটোত ধাৰাবাহিকভাৱে উচ্চস্বৰত সংগীত বাজি থকা শুনি চুবুৰীয়াই সন্দেহ প্ৰকাশ কৰি আজি আৰক্ষীক খবৰ দিয়ে। আৰক্ষী ঘটনাস্থলীত উপস্থিত হৈ উদ্ধাৰ কৰে যুৱতীগৰাকীৰ ৰক্তাক্ত মৃতদেহ।
জানিব পৰা মতে, সোমবাৰে গাজিয়াবাদৰ সিদ্ধাৰ্থ বিহাৰত থকা হিনা আৰু ৰমেশ নামৰ আত্মীয় দম্পতীহালৰ ঘৰলৈ গৈছিল ২৩ বছৰীয়া ছামিনা নামৰ যুৱতীগৰাকী। কিন্তু ঘৰৰ পৰা ৫ লাখ টকা মূল্যৰ গহনা নিৰুদ্দেশ হোৱা বুলি উল্লেখ কৰি দম্পতীহালে এই গহনাসমূহ সমীনাই চুৰি কৰা বুলি সন্দেহ কৰে।
আৰক্ষীয়ে জানিবলৈ দিয়া মতে, হিনা আৰু ৰমেশে যুৱতীগৰাকীক লাঠি আৰু ৰডেৰে আক্ৰমণ কৰিবলৈ আৰম্ভ কৰে। পিছত স্বীকাৰোক্তি উলিয়াবলৈ ব্লেডেৰে তাইৰ শৰীৰৰ কিছু অংশ নিৰ্দয়ভাৱে কাটি দিয়ে।
নিৰ্যাতনৰ ফলস্বৰূপে ছামিনাৰ মৃত্যু হোৱাৰ পিছতে অভিযুক্তই ঘৰৰ পৰা পলায়ন কৰে যদিও উচ্চ স্বৰত সংগীত বজায়েই থৈ যায় ঘৰত। ঘটনা সন্দৰ্ভত আৰক্ষীয়ে ইতিমধ্যে তদন্ত আৰম্ভ কৰিছে আৰু পলাতক দুই অভিযুক্তৰ সন্ধানত অনুসন্ধান অব্যাহত আছে বুলি এগৰাকী জ্যেষ্ঠ আৰক্ষী বিষয়াই সদৰী কৰিছে।
