পৃথিৱীক বিদায় জনালে বিশ্বৰ প্ৰসিদ্ধ দাৰ্শনিক, পণ্ডিত, নাট্যকাৰ, সাহিত্যিক তথা বিদ্বগ্ধ সমালোচক মিলান কুণ্ডেৰাই। দীৰ্ঘদিনীয়া অসুস্থতাত ভুগি থকা কুণ্ডেৰাই ৯৪ বছৰৰ বয়সত ইহলীলাল সম্বৰণ কৰে।
কুণ্ডেৰাৰ ব্যক্তিগত সংগ্ৰহ থকা মোৰাভিয়ান লাইব্ৰেৰীয়ে বুধবাৰে অৰ্থাৎ ১২ জুলাইত তেওঁৰ মৃত্যুৰ কথা আনুষ্ঠানকিভাৱে ঘোষণা কৰে। এই আনুষ্ঠানিক ঘোষণাৰ লগে লগে বিশ্বজুৰি বিয়পি থকা কুণ্ডেৰাৰ অনুৰাগী আৰু অনুগামীৰ মাজত শোকৰ বন্যা বৈছে। প্ৰকাশিত খবৰ মতে মিলান কুন্দেৰাৰ মৃত্যু হৈছে ফ্ৰান্সৰ ৰাজধানী পেৰিছত।
১৯২৯ চনৰ ১ এপ্ৰিলত তেতিয়াৰ চেকোশ্লোভাকিয়া আৰু বৰ্তমানৰ চেক-ৰিপাব্লিকত জন্মগ্ৰহণ কৰিছিল বিশ্বৰ প্ৰসিদ্ধ এই মহান লেখকগৰাকীয়ে। ১৯৬৮ চনত ৰাছিয়াৰ প্ৰাগ আক্ৰমণৰ বিষয়ে লিখাৰ বাবে নিজ দেশত সমালোচিত হোৱাৰ পাছত নিৰ্বাসিতও হয় কুণ্ডেৰাই।
১৯৭৫ চনত ফ্ৰান্সলৈ নিৰ্বাসিত হোৱাৰ পাছত ১৯৭৯ চনত চেকোশ্লোভাকিয়াই কুণ্ডেৰাৰ নাগৰিকত্ব বাতিল কৰে আৰু ১৯৮১ চনত ফ্ৰান্সৰ নাগৰিকত্ব লাভ কৰে। অৱশ্যে জীৱনৰ প্ৰায় শেষ বয়সত ২০১৯ চনত মিলান কুণ্ডেৰাক পুনৰ চেক নাগৰিকত্ব প্ৰদান কৰা হয়। নিৰ্বাসনৰ সময়ত চেকোশ্লোভাকিয়াত কুণ্ডেৰাৰ প্ৰথমখন উপন্যাস দ্য জ’ক ক নিষিদ্ধ কৰাও হৈছিল।
দ্য আনবেয়াৰেবল লাইটনেছ অৱ বিয়িঙৰ বাবে সমগ্ৰ বিশ্বতে পৰিচিত হৈ পৰে মিলান কুণ্ডেৰা। ১৯৮৪ চনত প্ৰকাশিত এই উপন্যাসখন প্ৰায় ৩০টা ভাষালৈ অনুবাদ কৰা হৈছে আৰু ইয়াৰ আধাৰত হলিউডৰ ছবি হিচাপেও নিৰ্মাণো কৰা হৈছে।
কুণ্ডেৰাই কেৱল উপন্যাস ৰচনা কৰাই নহয় এজন নাট্যকাৰ, কবি আৰু প্ৰবন্ধকাৰো আছিল। একবিংশ শতিকাৰ বিশ্বৰ অতি গুৰুত্বপূৰ্ণ চেক লেখক হিচাপে তেওঁ সমগ্ৰ বিশ্বতে প্ৰশংসিত হোৱাৰ লগতে স্বীকৃত হৈছে। কুণ্ডেৰাই বিভিন্ন বঁটা বাহনেৰে সন্মানিত হৈছে। ইয়াৰ ভিতৰত জেৰুজালেম বঁটা, দ্য আষ্ট্ৰীয়ান ষ্টেট প্ৰাইজ ফ’ৰ ইউৰোপীয়ান লিটাৰেচাৰ, ভিলেনিকা আন্তঃৰাষ্ট্ৰীয় সাহিত্য মহোৎসৱ সন্মান, হাৰ্ডাৰ প্ৰাইজ আৰু চেক ষ্টেট লিটাৰেচাৰ প্ৰাইজ আদি বঁটা আৰু সন্মানো আছে।
২০১৫ চনত কুণ্ডেৰাৰ শেষৰখন উপন্যাস দ্য ফেষ্টিভেল অফ ইনছিগনিফিকেনছ প্ৰকাশ পাইছিল। মাৰ্কিন সংবাদ পত্ৰ দ্য নিউয়ৰ্ক টাইমছ-এ মিলান কুণ্ডেৰাক “লিটাৰেৰি ষ্টাৰ” অৰ্থাৎ ‘তাৰকা সাহিত্যিক’ বুলি বিভূষিত কৰিছে।
