দেশবাসীৰ বাবে আজি গৌৰৱময় ক্ষণ। শ্ৰীহৰিকোটাৰ সতীশ ধাৱন মহাকাশ কেন্দ্ৰৰ লঞ্চ পেডৰ পৰা লক্ষ্য অভিমুখে সফলতাৰে উৎক্ষেপণ কৰা হয় চন্দ্ৰযান-৩।
ভাৰতবাসীৰ বাবে গৌৰৱৰ এই বিশেষ ক্ষণ, চন্দ্ৰযান-৩ৰ উৎক্ষেপনৰ কিছু দৃশ্য চাওঁ আহক:
পূৰ্বৰ বিফলতাক নেওচা দি ন উদ্যমেৰে চন্দ্ৰপৃষ্ঠ স্পৰ্শ কৰিবলৈ সাজু হৈছে ইছৰো।
চন্দ্ৰযানখন আগন্তুক ৪০ দিনৰ পাছত ২৩ৰ পৰা ২৪ আগষ্টৰ ভিতৰত চন্দ্ৰত অৱতৰণ কৰিব পাৰে। আজি উৎক্ষেপন হোৱা এই চন্দ্ৰযান-৩ৰ লেণ্ডাৰৰ নাম ‘বিক্ৰম’ আৰু ৰোভাৰৰ নাম ‘প্ৰজ্ঞান’।
ইছৰোৰ চন্দ্ৰযানৰ কেন্দ্ৰত আছে এল ভি এম-৩ ৰকেট। যিয়ে মহাকাশযানখনক শক্তি প্ৰদান কৰিব আৰু পৃথিৱীৰ কক্ষপথৰ পৰা বাহিৰলৈ ঠেলি দিব।
এইবাৰ চন্দ্ৰযান-৩ৰ লগত যোৱা লেণ্ডাৰ আৰু ইয়াৰ ভিতৰত থকা ৰোভাৰে চন্দ্ৰযান-২ৰ অৰ্বিটাৰৰ সহায় লৈ চন্দ্ৰত অৱতৰণ কৰিব। ইছৰোৰ এই গৱেষণা চন্দ্ৰৰ ওপৰত দুসপ্তাহ ধৰি চলি থাকিব। ইয়াৰ উপৰিও ইউৰোপীয় মহাকাশ সংস্থা আৰু নাছাৰ পৰাও সহায় ল’ব।
যদি এই অভিযান সফল হয় তেন্তে আমেৰিকা, ৰাছিয়া আৰু চীনৰ পিছত ভাৰত হ’ব চন্দ্ৰপৃষ্ঠত সফল অৱতৰণ কৰা বিশ্বৰ চতুৰ্থখন দেশ।
