কম্বোডিয়াৰ নতুন প্ৰধানমন্ত্ৰী হ’ল চাৰি দশক ধৰি ক্ষমতাত থকা হুন চেনৰ পুত্ৰ হুন মানেট। দক্ষিণ-পূব এছিয়াৰ দেশখনৰ ৰজা নৰোডাম ছিহামানীয়ে তেওঁক নতুন প্ৰধানমন্ত্ৰী হিচাপে ‘নিযুক্তি’ দিছে। কিন্তু তাৰ আগতে মানেটে সংসদত আস্থা ভোটত জয় লাভ কৰিব লাগিব।
মানেটক নিযুক্তি দিয়াৰ বাবে ৰজাৰ আদেশৰ খবৰটো হুন চেনে নিজেই তেওঁৰ টেলিগ্ৰাম চেনেলত ঘোষণা কৰিছে।
১৯৮৫ চনৰ পৰা কম্বোডিয়াত শাসন কৰি আহিছে খামেৰ ৰুজৰ প্ৰাক্তন নেতা হুন চেনে। যোৱা মাহত নিৰ্বাচনত জয়ী হোৱাৰ পিছত তেওঁ ৰাজনীতিৰ পৰা অৱসৰ লোৱাৰ লগতে ডাঙৰ পুত্ৰক ক্ষমতা অৰ্পণ কৰাৰ কথা ঘোষণা কৰে। সেই নিৰ্বাচনত সংসদৰ নিম্ন সদনৰ ১২৫খন আসনৰ ভিতৰত ১২০খন আসনত হুন চেনৰ কম্বোডিয়ান পিপলছ পাৰ্টিয়ে জয়লাভ কৰে।
লগতে পঢ়ক: নীলা-সেউজীয়া ৰঙৰ বৰ্ণচ্ছটা! চন্দ্ৰৰ কক্ষপথত উপনীত হৈয়েই প্ৰথম ছবি প্ৰেৰণ চন্দ্ৰযান-৩ৰ (ভিডিঅ’)
বিৰোধী দল কেণ্ডেললাইট পাৰ্টিক নিৰ্বাচনত অংশগ্ৰহণ কৰিবলৈ দিয়া নহ’ল। পশ্চিমীয়া বিশ্বই এই নিৰ্বাচনক প্ৰৱঞ্চনা বুলি অভিহিত কৰিছে।
নিৰ্বাচনৰ পিছত আমেৰিকাই কম্বোডিয়াত একাংশ লোকৰ ওপৰত ভিছা নিষেধাজ্ঞা জাৰি কৰিছে, লগতে কিছুমান বিদেশী সাহায্য কাৰ্যসূচী স্থগিত ৰখা হয়।
আমেৰিকাৰ বিদেশ মন্ত্ৰালয়ৰ মুখপাত্ৰ মেথিউ মিলাৰে এক বিবৃতিত কয় যে কম্বোডিয়াৰ নিৰ্বাচন মুক্ত আৰু নিকা নহয়। নিৰ্বাচনত প্ৰধানমন্ত্ৰী হুন চেনৰ চিপিপি দলৰ কোনো শক্তিশালী বিৰোধী দল নাছিল।
ক্ষমতাত থকাৰ সময়তে হুন চেনে বিৰোধী দলসমূহৰ ওপৰত নিষেধাজ্ঞা জাৰি কৰিছে। তেওঁক প্ৰত্যাহ্বান জনোৱাসকলক দেশ এৰি যাবলৈ বাধ্য কৰিছে আৰু বাক স্বাধীনতা খৰ্ব কৰিছে।
লগতে পঢ়ক: ‘সম্পর্ক গঢ়িলেও ‘পত্নী’ৰ লেখীয়া কাকো বিচাৰি নাপালো’; প্ৰেম জীৱনৰ গোপন ৰহস্য মুকলি কৰিলে ৰতন টাটাই
তেওঁৰ পুত্ৰ মানেট এজন জ্যেষ্ঠ সামৰিক বিষয়া আৰু দেশৰ সন্ত্ৰাসবাদ বিৰোধী বিভাগৰ মুৰব্বী। যোৱা মাহৰ নিৰ্বাচনত তেওঁ এখন আসনত জয় লাভ কৰিছিল। ৪৫ বছৰীয়া মানেট আমেৰিকাৰ সামৰিক একাডেমীত প্ৰশিক্ষণ প্ৰাপ্ত। তেওঁ যুৱ বয়সৰ সময়ছোৱা বিদেশতে কটাইছে।
