জাৰ্মানীৰ সৈতে অংশীদাৰিত্বৰে সামুদ্ৰিক ছাবমেৰিনৰ প্ৰস্তুতি আৰম্ভ কৰিছে ভাৰতে। ৬ মাহতকৈ অধিক সময় আলোচনাধীন হৈ থকাৰ পিছত কেন্দ্ৰই প্ৰতিৰক্ষা মন্ত্ৰালয় আৰু মাজাগন ডকয়াৰ্ডছ লিমিটেড (এমডিএল)ক জাৰ্মানীৰ সৈতে অংশীদাৰিত্বৰে ছাবমেৰিন নিৰ্মাণৰ আলোচনা কৰিবলৈ অনুমতি প্ৰদান কৰিছে। ভাৰত চৰকাৰৰ লক্ষ্য হৈছে মেক ইন ইণ্ডিয়া প্ৰকল্পৰ অধীনত ৬খন অত্যাধুনিক ছাবমেৰিন যৌথভাৱে নিৰ্মাণ কৰা। য’ত থাকিব ইণ্ডিপেণ্ডেণ্ট প্ৰপালচন (এআইপি) ব্যৱস্থা। এই প্ৰকল্পৰ আনুমানিক ব্যয় হ’ব ৭০ হাজাৰ কোটি টকা।
যোৱা জানুৱাৰী মাহত প্ৰতিৰক্ষা মন্ত্ৰালয়ে জাৰ্মান কোম্পানী থিচেনক্ৰুপ মেৰিন চিষ্টেমছৰ সৈতে অংশীদাৰিত্বৰে ৬খন চাবমেৰিন নিৰ্মাণৰ বাবে চৰকাৰী এমডিএলক নিৰ্বাচন কৰিছিল। ইয়াৰ পাছত যোৱা ৭ মাহত এই সন্দৰ্ভত কোনো ধৰণৰ কাৰ্যকলাপ হোৱা নাই যদিও শেহতীয়াকৈ কেন্দ্ৰই জাৰ্মান কোম্পানীটোৰ সৈতে আলোচনা আৰম্ভ কৰিবলৈ নিৰ্দেশ দিছে। সংবাদ সংস্থা এএনআইক দিয়া এক সাক্ষাৎকাৰত প্ৰতিৰক্ষা বিভাগৰ এগৰাকী বিষয়াই কয় যে চলিত মাহৰ শেষৰ ফালে এই প্ৰক্ৰিয়া আৰম্ভ হোৱাৰ সম্ভাৱনা আছে। কেন্দ্রই দেশৰ ছাবমেৰিনৰ বহৰ বৃদ্ধি কৰি অধিক আধুনিক কৰি তুলিব বিচাৰিছে৷ সেই ৰোডমেপ প্ৰস্তুত কৰিবলৈ শেহতীয়াকৈ এখন উচ্চ পৰ্যায়ৰ বৈঠক অনুষ্ঠিত হৈছিল। এই বিষয়ত সিদ্ধান্ত লোৱা হ’ল। যদি সকলো ঠিকে থাকে তেন্তে আগন্তুক ৬ মাহৰ ভিতৰত এই বিষয়ত চুক্তিও সম্পূৰ্ণ হ’ব।
কেন্দ্ৰই জনাইছে যে ভাৰতীয় নৌসেনাই জাৰ্মান কোম্পানী এটাৰ সৈতে যৌথ উদ্যোগত প্ৰজেক্ট ৭৫ ইণ্ডিয়াৰ অধীনত এই ৬ খন চাবমেৰিন নিৰ্মাণ কৰিব। এই চাবমেৰিনসমূহৰ বিশেষত্ব হ’ব যে ইহঁতে উশাহ নোলোৱাকৈ ৩ সপ্তাহ পানীৰ তলত থাকিব পাৰিব। জাৰ্মান এআইপি প্ৰযুক্তিয়ে এই চাবমেৰিনসমূহক এই বিশেষ ক্ষমতা প্ৰদান কৰিব। ইয়াৰ উপৰিও ভাৰতে দুখন পাৰমাণৱিক চালিত চাবমেৰিন নিৰ্মাণৰ কামো কৰি আছে। য’ত ব্যক্তিগত কোম্পানী লাৰ্চেন এণ্ড টৌব্ৰ’ আৰু চাবমেৰিন বিল্ডিং চেণ্টাৰে গুৰুত্বপূৰ্ণ ভূমিকা পালন কৰিব।
মন কৰিবলগীয়া যে ভাৰত মহাসাগৰত শেহতীয়াকৈ চীন মূৰৰ বিষত পৰিণত হৈছে। যোৱা কেইবছৰমানৰ পৰা চীনৰ নৌসেনাই দ্ৰুত আধুনিকীকৰণৰ পথত আগবাঢ়িছে। এনে পৰিস্থিতিত ভাৰত মহাসাগৰত চীনৰ ওপৰত চকু ৰাখিবলৈও প্ৰস্তুতি আৰম্ভ কৰিছে। এই প্ৰকল্পটো তাৰ উদাহৰণ। ভাৰতীয় নৌসেনাই অহা দশকত পৰ্যায়ক্ৰমে প্ৰায় ১০খন চাবমেৰিনক অৱসৰ লোৱাৰ পৰিকল্পনা কৰিছে। একে সময়ছোৱাতে খালী ঠাই পূৰণ কৰিবলৈ অন্যান্য ছাবমেৰিনকো প্ৰৱেশৰ প্ৰস্তুতি চলি আছে। এই নতুন প্ৰকল্পই ভাৰতৰ নৌসেনাৰ শক্তি বৃদ্ধি কৰাই নহয়, থলুৱা প্ৰতিৰক্ষা উৎপাদনকো শক্তিশালী কৰিব।
