দেওবাৰে নিশাৰ পৰা হিমাচল প্ৰদেশত হোৱা ডাৱৰ বিস্ফোৰণ আৰু ভূমিস্খলনত মৃত্যুৰ সংখ্যা ৪১ জনলৈ বৃদ্ধি পাইছে। ইয়াৰে ৯ জন লোকৰ মৃত্যু হৈছে কেৱল শিৱমন্দিৰ খহি পৰাৰ ফলত। ধ্বংসাৱশেষৰ তলত আৰু বহু লোক আবদ্ধ হৈ আছে বুলি আশংকা কৰিছে প্ৰশাসনে।
হিমাচল প্ৰদেশৰ মুখ্যমন্ত্ৰী সুখৱিন্দৰ সিং চুখুৱে ৰাজ্যবাসীক বিপদৰ পৰা হাত সাৰিবলৈ বিশেষ প্ৰয়োজন নহ’লে ঘৰতে থাকিবলৈ পৰামৰ্শ দিয়ে। বৰষুণৰ ফলত বিধ্বস্ত আৰু ভূমিস্খলন প্ৰৱণ অঞ্চললৈ নাযাবলৈও মুখ্যমন্ত্ৰীগৰাকীয়ে পৰ্যটকসকলক আহ্বান জনায়।
আনহাতে, কেন্দ্ৰীয় গৃহমন্ত্ৰী অমিত শ্বাহৰ নিৰ্দেশমৰ্মে ৰাষ্ট্ৰীয় দুৰ্যোগ সঁহাৰি বাহিনীয়ে উদ্ধাৰৰ কাম আৰম্ভ কৰিছে।
হিমাচল প্ৰদেশৰ দৰেই চুবুৰীয়া ৰাজ্য উত্তৰাখণ্ডতো বৰষুণ আৰু ভূমিস্খলনৰ ফলত ক্ষতি হৈছে। ধাৰাবাহিক বৰষুণৰ ফলত ইতিমধ্যে উত্তৰাখণ্ডৰ বহু পথ আৰু দলং ধ্বংস হৈছে। বিপদ সীমাৰ ওপৰেৰে বৈ গৈছে নদী।
কোনো ধৰণৰ অপ্ৰীতিকৰ ঘটনাৰ পৰা হাত সাৰিবলৈ উত্তৰাখণ্ডৰ সকলো শিক্ষানুষ্ঠান বন্ধ ঘোষণা কৰা হৈছে। আপাততঃ উত্তৰাখণ্ড প্ৰশাসনে কেদাৰনাথ, বদ্ৰীনাথ, গংগোত্ৰী আৰু যমুনোত্ৰী যাত্ৰা ১৫ আগষ্টলৈ স্থগিত ৰাখিছে।
উত্তৰাখণ্ড প্ৰশাসনৰ সূত্ৰ অনুসৰি ৰুদ্ৰপ্ৰয়াগ, দেৱপ্ৰয়াগ আৰু শ্ৰীনগৰত গংগা, মন্দাকিনি আৰু অলকানন্দ নদীৰ পানী বিপদসীমাৰ ওপৰেৰে বৈ আছে। ইতিমধ্যে ভৈয়াম অঞ্চল প্লাৱিত হৈ পৰিছে। ৰাষ্ট্ৰীয় ঘাইপথকে ধৰি বিভিন্ন পথ বানপানীত বুৰ গৈছে। ফলত ঋষিকেশ-দেৱপ্ৰয়াগ-শ্ৰীনগৰ ৰাষ্ট্ৰীয় ঘাইপথতো যাতায়ত বন্ধ হৈ পৰিছে।
ইতিমধ্যে উত্তৰাখণ্ডৰ প্ৰায় ১১৬৯টা ঘৰ আৰু বৃহৎ পৰিমাণৰ কৃষিভূমি ক্ষতিগ্ৰস্ত হৈছে। বতৰ বিজ্ঞান বিভাগে জনাইছে যে আগন্তুক কেইদিনমানলৈ বৰষুণ অব্যাহত থাকিব।
ডেৰাডুন, নৈনীতালকে ধৰি উত্তৰাখণ্ডৰ ৬ খন জিলাত মৌসম ভৱনে ৰেড এলাৰ্ট জাৰি কৰিছে। আগন্তুক কেইদিনমানৰ বাবে হিমাচল প্ৰদেশতো প্ৰচণ্ড বৰষুণৰ পূৰ্বাভাস দিয়া হৈছে।
ইফালে হিমাচলৰ ২৭০ খন দোকান, ২৭২৭টা গোশালা আৰু ১,৩৭৬ টা ঘৰ সম্পূৰ্ণৰূপে ক্ষতিগ্ৰস্ত হৈছে।
কেন্দ্ৰীয় গৃহমন্ত্ৰী অমিত শ্বাহে কেন্দ্ৰীয় বাহিনীক পৰিস্থিতি চম্ভালিবলৈ নিৰ্দেশ দিছে। তেওঁ মন্তব্য কৰে যে ধাৰাসাৰ বৰষুণ আৰু ভূমিস্খলনৰ ফলত ইমানবোৰ লোকৰ মৃত্যু ‘অত্যন্ত যন্ত্ৰণাদায়ক’।
