পৰ্যটকৰ আকৰ্ষণস্থলী উমিয়াম হ্ৰদ ক্ৰমাগতভাৱে আৱৰ্জনাৰে ভৰি পৰাৰ সময়তে আৱৰ্জনা নিষ্কাষণৰ বাবে কৃত্ৰিম বুদ্ধিমত্তা, চমুকৈ AI প্ৰযুক্তি প্ৰৱৰ্তনৰ চিন্তা-চৰ্চা চলাইছে মেঘালয় চৰকাৰে।
মেঘালয় চৰকাৰে AI প্ৰযুক্তিৰ সহায়ত এই পৰ্যটনস্থলীত পূৰ্বৰ সৌন্দৰ্য পুনৰ ঘূৰাই অনাৰ বাবে সাজু হৈছে।
এই পদক্ষেপৰ পৰীক্ষণ স্বৰূপে শুকুৰবাৰে উমিয়াম হ্ৰদৰ আৱৰ্জনা নিষ্কাষণৰ বাবে AI প্ৰযুক্তিৰ ব্যৱহাৰৰ এক প্ৰদৰ্শনীৰ আয়োজন কৰা হয়।
প্ৰদৰ্শনৰ অংশ হিচাপে উমিয়াম হ্ৰদৰ মাউডুন এলেকাৰ কিণ্ডং ৰেলাত AI পৰিচালিত ৰবটিক নাও মোতায়েন কৰা হয়।
মেঘালয় চৰকাৰে ক্লিয়াৰবটৰ সহযোগত স্মাৰ্ট ভিলেজ মুভমেণ্টৰ পদক্ষেপৰ অধীনত সপ্তাহজোৰা এই পাইলট প্ৰজেক্টৰ উদ্যোগ লৈছে।
পৰিৱেশ সংৰক্ষণ আৰু প্ৰযুক্তিগত উন্নতিৰ ক্ষেত্ৰত এক নতুন মানদণ্ড নিৰ্ধাৰণক এই প্ৰকল্পৰ লক্ষ্য বুলি উল্লেখ কৰা হৈছে।
AI চালিত এই নাৱে প্ৰদূষণৰ কেন্দ্ৰস্থল চিনাক্ত কৰি প্ৰদূষণ নিয়ন্ত্ৰণৰ এক ফলপ্ৰসূ সমাধান আগবঢ়ায় আৰু ৪ ঘণ্টাৰ ভিতৰতে ২০০ কিলোগ্ৰাম আৱৰ্জনা নিষ্কাষণ কৰিব পাৰে।
