কাষ চাপিছে ২৪ ৰ লোকসভা নিৰ্বাচন। নিৰ্বাচনৰ বাবে ৰণকৌশল চৰ্চাত ব্যস্ত হৈ পৰিছে শাসক বিৰোধী। এনে সময়তে পশ্চিম বংগৰ মুখ্যমন্ত্ৰী মমতা বেনাৰ্জীয়ে এক চাঞ্চল্যকৰ দাবী কৰিছে।
মমতা বেনাৰ্জীৰ দাবী, বিজেপিয়ে হয়তো চলিত বৰ্ষৰ ডিচেম্বৰ মাহতে লোকসভা নিৰ্বাচন অনুষ্ঠিত কৰিব পাৰে আৰু নিৰ্বাচনৰ প্ৰচাৰৰ বাবে বুকিং কৰিছে সকলো হেলিকপ্টাৰ।
মুখ্যমন্ত্ৰীগৰাকীয়ে লগতে আন এক সাৱধানবাণীও শুনাইছে দেশবাসীক। তেওঁৰ মতে, বিজেপিয়ে যদি আগন্তুক নিৰ্বাচনত জয়ী হৈ তৃতীয়টো কাৰ্যকাল লাভ কৰে, তেতিয়া স্বৈৰাচাৰী শাসনৰ সন্মুখীন হোৱাটো নিশ্চিত।
“যদি বিজেপিয়ে একেৰাহে তৃতীয়বাৰৰ বাবে ক্ষমতালৈ ঘূৰি আহে, দেশ স্বৈৰাচাৰী শাসনৰ সন্মুখীন হ’ব। মই আশংকাত ভুগিছো যে বিজেপিয়ে লোকসভা নিৰ্বাচন ডিচেম্বৰ মাহত বা অহা বছৰৰ জানুৱাৰী মাহত অনুষ্ঠিত কৰিব পাৰে।”- বেনাৰ্জীয়ে কয়।
মমতা বেনাৰ্জীৰ মতে, বিজেপিয়ে ইতিমধ্যে ভাৰতক বিভিন্ন সম্প্ৰদায়ৰ মাজত বিদ্বেষপূৰ্ণ এখন দেশলৈ ৰূপান্তৰিত কৰিছে। যদি বিজেপি পুনৰ ক্ষমতালৈ ঘূৰি আহে, তেতিয়া দলটোৱে ভাৰকত ঘৃণাৰ দেশ কৰি তুলিব বুলিও উদ্বেগ প্ৰকাশ কৰে মুখ্যমন্ত্ৰীগৰাকীয়ে।
আন কোনো ৰাজনৈতিক দলে যাতে লোকসভা নিৰ্বাচনত প্ৰচাৰৰ বাবে হেলিকপ্টাৰ ব্যৱহাৰ কৰিব নোৱাৰে, তাৰ বাবে বিজেপিয়ে ইতিমধ্যে সকলো হেলিকপ্টাৰ বুকিং কৰিছে বুলিও তেওঁ দাবী কৰে।
উল্লেখ্য যে, আগন্তু নিৰ্বাচনত বিজেপিক ৰোধ কৰাৰ মানসেৰে একজোঁট হোৱা বিৰোধী মিত্ৰজোঁট INDIAৰ অন্যতম অংশীদাৰ মমতা বেনাৰ্জী নেতৃত্বাধীন তৃণমূল কংগ্ৰেছ। মমতা বেনাৰ্জীৰ এই দাবী সন্দৰ্ভত অৱশ্যে INDIA ই আনুষ্ঠানিকভাৱে কোনো মন্তব্য কৰা নাই।
