পুনৰ উত্তপ্ত হৈ উঠিছে মণিপুৰ। কেইদিনমানৰ সাময়িক শান্তিৰ পিছত কালি ৰাজ্যখন পুনৰ ৰক্তাক্ত হৈ উঠিল। কুকি অধ্যুষিত চুৰাচান্দপুৰ আৰু মেইটেই অধ্যুষিত বিষ্ণুপুৰ জিলাৰ সীমান্তৱৰ্তী অঞ্চলত কালি সৃষ্টি হয় তীব্ৰ সংঘৰ্ষ।
মণিপুৰ আৰক্ষীয়ে জানিবলৈ দিয়া মতে, নৰসেনাৰ সংলগ্ন গাঁৱত এই গুলীচালনাত দুগৰাকী লোকৰ মৃত্যু হয়। এই সংঘৰ্ষত ৭ গৰাকী লোক আঘাতপ্ৰাপ্ত হয়।
আৰক্ষীয়ে লগতে উল্লেখ কৰা মতে, অঞ্চলটোত নিয়োজিত জিলা আৰক্ষী, অসম ৰাইফলছ, সেনা আৰু কেন্দ্ৰীয় বাহিনীয়ে তাৎক্ষণিকভাৱে সষ্টম হৈ পৰিস্থিতি নিয়ন্ত্ৰণ কৰে।
ইফালে খিলঞ্জীয়া জনজাতি নেতা মঞ্চই মঙলবাৰে খোইৰেন্টাক অঞ্চলৰ আশে-পাশে থকা গাঁওসমূহত গুলীচালনাৰ ফলত গাঁৱৰ এগৰাকী স্বেচ্ছাসেৱক নিহত হৈছে বুলি দাবী কৰিছে। নিহত ব্যক্তিগৰাকীক ৩০ বছৰীয়া জংমিনলুন গাংটে বুলি চিনাক্ত কৰা হৈছে।
এই ঘটনাসমূহৰ লগতে খোইৰেন্টাক আৰু থিনুংগেই অঞ্চলতো সংঘৰ্ষৰ সূত্ৰপাত হয় বুলি খবৰ প্ৰকাশ পাইছে। আনহাতে সন্দেহযুক্ত উগ্ৰপন্থীয়ে আন এক অঞ্চলত এজন কৃষকক গুলীয়াই হত্যা কৰে বুলিও সূত্ৰই প্ৰকাশ কৰিছে।
কালি পুৱা থিনুংগেই মানিং লেইকাইত পথাৰত কাম কৰি থকাৰ সময়তে ছালাম জোটিন নামৰ এগৰাকী ব্যক্তি অচিনাক্ত দুৰ্বৃত্তৰ গুলীবৰ্ষণত গুৰুতৰভাৱে আহত হৈছিল।
বুকুত গুলীৰ আঘাত পোৱাৰ পিছতে ব্যক্তিগৰাকীক লগে লগে ইম্ফলৰ এখন ব্যক্তিগত চিকিৎসালয়ত ভৰ্তি কৰোৱা হয়। আহত ব্যক্তিগৰাকীৰ অৱস্থা সংকটজনক বুলি চিকিৎসকে জানিবলৈ দিয়ে।
