বৃহস্পতিবাৰে ডি ৱাই এফ আইৰ অসম ৰাজ্যিক কমিটিয়ে ইয়াৰ হেদায়েতপুৰস্থিত ৰাজ্যিক কাৰ্যালয়ত এক সংবাদ মেল আয়োজন কৰে। সংবাদ মেল সম্বোধন কৰে ৰাজ্যিক সম্পাদক ৰিতু ৰঞ্জন দাস আৰু ৰাজ্যিক যুটীয়া সম্পাদক নিৰংকুশ নাথে।
সংবাদ মেলত বক্তব্য ৰাখি কয় যে অনবৰতে স্বচ্ছ আৰু নিকা নিযুক্তিৰ কথা কৈ থকা অসমৰ মুখ্যমন্ত্ৰী হৈছিল ড: হিমন্ত বিশ্ব শৰ্মাৰ পৃষ্ঠপোষকতাতে অসমৰ শেহতীয়া ইতিহাসৰ আটাইতকৈ অ-স্বচ্ছ নিযুক্তি পৰীক্ষা অনুষ্ঠিত হ’ল। ১ লাখ নিযুক্তিৰ অংশ হিচাপে মুখ্যমন্ত্ৰীৰ নেতৃত্ব অনুষ্ঠিত পৰীক্ষাৰ জৰিয়তে একাংশই উত্তীৰ্ণ হ’ল, চাকৰি পালে, চাকৰিত যোগদান কৰিলে কিন্তু নাজানিলে কিমান নম্বৰ লাভ কৰিলে। ৰাজ্যিক পৰ্যায়ৰ নিযুক্তি আয়োগ(SLRC)ৰ জৰিয়তে তৃতীয় আৰু চতুৰ্থ বৰ্গৰ যি পৰীক্ষা অনুষ্ঠিত হৈছিল সেই পৰীক্ষাত কোনে কিমান নম্বৰ পালে, কোন বিভাগত কি ধৰণৰ কাট অফ নম্বৰ, সেয়া পৰীক্ষা অনুষ্ঠিত হোৱাৰ আজি এবছৰৰ পাছতো ৰাজহুৱা কৰা নহ’ল। প্ৰতিটো পৰীক্ষাত কোনে কিমান নম্বৰ লাভ কৰিলে সেয়া প্ৰত্যেক প্ৰাৰ্থীৰ জনাৰ অধিকাৰ আছে, কিন্তু আজিলৈ সেয়া জনোৱা নহ’ল। ইয়াতকৈ আচৰিত আৰু হতভম্ব হোৱাৰ অন্য কাৰণ থাকিব পাৰে জানো? আমি সেয়ে দাবী জনাইছোঁ যে স্বচ্ছ আৰু নিকা নিযুক্তিৰ প্ৰমাণ হিচাপে মুখ্যমন্ত্ৰী মহোদয়ে অতি শীঘ্ৰে প্ৰাৰ্থীসকলে লাভ কৰা নম্বৰসহ এক তালিকা প্ৰকাশ কৰাৰ লগতে বিভাগসমূহৰ কাট অফ নম্বৰ প্ৰকাশ কৰক।
মন কৰিবলীয়া যে এজন প্ৰাৰ্থীৰ বহু পদত নিৰ্বাচিত হোৱাৰ পৰিপ্ৰেক্ষিতত আৰু প্ৰতিবাদৰ সন্মুখীন হৈ মুখ্যমন্ত্ৰীয়ে এখন অতিৰিক্ত তালিকা প্ৰকাশৰ ঘোষণা কৰিছিল। প্ৰথমে জুলাই মাহত ৮৩৫ প্ৰাৰ্থীৰ বাবে জুলাইৰ ভিতৰতে আৰু আগষ্ট মাহৰ প্ৰথম সপ্তাহত ১০০০ প্ৰাৰ্থীৰ বাবে অতিৰিক্ত তালিকা প্ৰকাশৰ প্ৰতিশ্ৰুতিৰে চমক দিছিল যদিও কালি কেৱল ৫১৪ গৰাকী প্ৰাৰ্থীৰ অতিৰিক্ত তালিকা প্ৰকাশ কৰি আশাৰে বাট চাই থকা প্ৰাৰ্থীক ব্ৰহ্মঠগন সোধালে মুখ্যমন্ত্ৰীয়ে। এনেকৈ সম্পূৰ্ণ বাকী আৰু ফাঁকিৰে চৰকাৰ চলি আছে। সেয়ে ব্যৱস্থাটো ওপৰৰ পৰাই যে অ-স্বচ্ছ,সেয়া স্পষ্ট। তদুপৰি চতুৰ্থ বৰ্গৰ পদত বহু উচ্চ শিক্ষিত যুৱক-যুৱতীৰ নিযুক্তিৰ বিৰুদ্ধে অভিযোগ অনাৰ পিছতো কোনো তদন্ত নহ’ল।
অন্যহাতে বিজেপিৰ নেতা-পালিনেতাৰ সংঘৱদ্ধ নেতৃত্বতে ভয়াবহ চাকৰি বজাৰ চলিছে যে সেয়া সকলোৱে গম পাইছে। ৰাজ্যিক পৰ্যায়ৰ নেতাৰ নাম সন্মুখলৈ অহাৰ ঘটনাই মূল অভিকেন্দ্ৰ “বাজপেয়ী ভৱন” বুলি সকলোৱে বুজিব পাৰিছে। দুৰ্নীতি-কেলেংকাৰীৰে জড়িত ব্যক্তি, ঠগ- প্ৰবঞ্চক আৰু সমাজ বিৰোধীৰে ভৰি পৰিছে দলটো। “দুৰ্নীতিৰ বিৰুদ্ধে শূন্য সহনশীলতাৰ নীতি” আৰু “স্বচ্ছ আৰু নিকা নিযুক্তি”ৰ শ্লোগানক ধোৱাচাংত তুলি দুৰ্নীতিক প্ৰতিষ্ঠানিক ৰূপ দিছে বিজেপি দলটোৱে।
এপিএছচিৰ পৰা গাঁওবুঢ়া নিযুক্তিলৈ সকলোতে কেৱল দুৰ্নীতি আৰু দুৰ্নীতি। টকাৰ বিনিময়ত চাকৰি লোৱাটো বিজেপি চৰকাৰৰ দিনত অঘোষিত নিয়মত পৰিণত হৈছে আৰু ইয়াৰ মূল অভিকেন্দ্ৰ হৈছে বাজপেয়ী ভৱন। মুখ্যমন্ত্ৰী হিমন্ত বিশ্ব শৰ্মাৰ অজ্ঞাতে এনে ভয়াবহ কেলেংকাৰী হৈছে বুলি বিশ্বাস নহয়। তেখেতৰ জ্ঞাতে যে এখন চাকৰিৰ বজাৰ সৃষ্টি হৈছে সেয়া শেহতীয়া ঘটনাৰাজিয়ে প্ৰমাণ কৰিছে। এই সমগ্ৰ ঘটনাৰ সঠিক বিচাৰৰ খাতিৰত এক ন্যায়িক দাবী কৰিছোঁ আৰু সমগ্ৰ নিযুক্তিক লৈ এক শ্বেতপত্ৰ প্ৰকাশ কৰিবলৈ ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে দাবী কৰিছে।
আচৰিত কথা যে এই সমগ্ৰ নিযুক্তি কেলেংকাৰীতে বিজেপি দলৰ শীৰ্ষ পৰ্যায়ৰ নেতা-নেত্ৰী জড়িত হৈ পৰিছে।
অকল তৃতীয় আৰু চতুৰ্থ বৰ্গৰ পদতেই নহয়, এপিএছচিৰ পৰা সাধাৰণ গাঁওবুঢ়া নিযুক্তিলৈকে সকলোতে কেৱল টকাৰ বিনিময়ত চাকৰি দিয়াৰ অভিযোগ উঠিছে। কিন্তু তাৎপৰ্যপূৰ্ণ কথা হ’ল পৰিস্থিতিৰ বাধ্যবাধকতা বা ৰাইজক দেখুৱাবলৈ দুই এজন অভিযুক্তিক গ্ৰেপ্তাৰ কৰিলে কোন এজন ব্যক্তিৰ বিৰুদ্ধে চূড়ান্ত ব্যৱস্থা লোৱা পৰিলক্ষিত নহ’ল। এপি এছ চি বিল্পৱ শৰ্মা আয়োগে চূড়ান্ত প্ৰতিবেদন কেবিনেটত জমা দিয়াৰ পাছতো অভিযুক্তৰ বিৰুদ্ধে ব্যৱস্থা লোৱাৰ সলনি তেওঁলোকক পদোন্নতি দিছে। পি এণ্ড আৰ ডিৰ নিযুক্তিত হোৱা কেলেংকাৰীৰ তদন্ত কৰিবলৈ এজনী আয়োগ গঠন কৰা হ’ল যদিও আজিলৈ কোনো কথা স্পষ্ট হোৱা নাই।
এছ আই কেলেংকাৰীৰ মূল অভিযুক্তই পুনৰ আহি কেলেংকাৰীত সোমাই পৰিল। এনেবোৰ কথাই প্ৰমাণ কৰে এই সমগ্ৰ কেলেংকাৰী দিশপুৰৰ জ্ঞাতসাৰে চলি আছে আৰু চলি থাকিবলৈ দিয়া হৈছে।
ডি ৱাই এফ আইয়ে দুৰ্নীতি-কেলেংকাৰীৰ বিৰুদ্ধে কঠোৰ ব্যৱস্থা গ্ৰহণ কৰাৰ লগতে সঁচা অৰ্থৎ স্বচ্ছ আৰু নিকা নিযুক্তি আৰম্ভ কৰিবলৈ দাবী উত্থাপন কৰিছে। এই দাবীৰ লগতে নতুন পদ সৃষ্টি, পদ বিলুপ্তিৰ সিদ্ধান্ত বাতিল, কেন্দ্ৰীয় চৰকাৰৰ অধীনকে ধৰি সকলো খালী পদ শীঘ্ৰে পূৰণ কৰা, ঠিকাভিত্তিক শিক্ষকৰ চাকৰি বেতন সুৰক্ষাসহ নিয়মীয়া কৰা, ভেন্সাৰ শিক্ষানুষ্ঠানৰ শিক্ষক-কৰ্মচাৰীৰ চাকৰি প্ৰাদেশিকীকৰণ কৰা, টিউটৰ সকলোক শিক্ষকৰ মৰ্যাদা দিয়া, APSC কেলেংকাৰী সম্পৰ্কত বিপ্লৱ কুমাৰ শৰ্মা আয়োগে দাখিল কৰা প্ৰতিবেদন ৰাজহুৱা কৰাৰ লগতে আয়োগে দোষী সাব্যস্ত কৰাৰ সকলৰ বিৰুদ্ধে ব্যৱস্থা গ্ৰহণ কৰা, নিয়োগ বিনিময় কেন্দ্ৰত নাম পঞ্জীয়ন কৰতে দাখিল কৰা স্থায়ী বাসিন্দাৰ প্ৰমাণ পত্ৰৰ সঠিক পৰীক্ষণ কৰা,অসম চৰকাৰৰ নিয়োগ পৰ্টেল (job.assam.gov.in) সকলো ব্যক্তিগত খণ্ডৰ চাকৰিৰ বিজ্ঞাপন দিয়া বাধ্যতামূলক কৰাৰ লগতে তৃতীয় আৰু চতুৰ্থ বৰ্গৰ পদত অসমৰ নিবনুৱাক নিযুক্তি বাধ্যতামূলক কৰা, অসমৰ প্ৰাকৃতিক সম্পদৰ ভিত্তিত উদ্যোগ গঢ়ি তোলা, চাহ শ্ৰমিক আৰু চাহ উদ্যোগ ৰক্ষা কৰা, নতুন প্ৰজন্মৰ খেতিয়ক, উদ্যোগী, পদপথৰ ব্যৱসায়ীসকলৰ নিৰাপত্তা আৰু বিশেষ আৰ্থিক সাহায্য ঘোষণা কৰা, শ্বপিং মল, ৰেষ্টুৰেণ্ট, ব্যক্তিগত শিক্ষানুষ্ঠান, চৰকাৰী-বেচৰকাৰী প্ৰতিষ্ঠানত কাম কৰা প্ৰতিজনলৈ ন্যূনতম ২১ হাজাৰ টকা দৰমহা দিয়া, অলা-উবেৰ, চুইগী-জামেটোসহ এপ কৰ্মীসকলৰ বাবে বিকল্প চৰকাৰী এপ মুকলি কৰক আৰু সামাজিক নিৰাপত্তা আইন প্ৰণয়ন কৰা, নতুন পেঞ্চন আঁচনি বাতিল কৰি পুৰণি পেঞ্চন ব্যৱস্থা প্ৰৱৰ্তন কৰা, বহিঃৰাজ্যত কৰ্মৰ সন্ধানত যোৱা যুৱক-যুৱতীৰ নাম পঞ্জী কৰা আৰু কামৰ নিৰাপত্তা নিশ্চিত কৰা, এমজিএনৰেগা আঁচনিত পৰ্যাপ্ত ধন আৱন্টন দি কাম দিয়াৰ ব্যৱস্থা কৰা, ৰাজহুৱা শিক্ষা ৰক্ষা কৰা, শিক্ষা আৰু নিযুক্তিত মাতৃভাষাক প্ৰাধান্য দিয়াসহ মুঠ ১৫ দফীয়া দাবী চনদৰ ভিত্তিত ১৫ ছেপ্টেম্বৰত গুৱাহাটীত এক যুৱ সমাৱেশৰ আহ্বান কৰিছে।
চৰকাৰৰ যুৱ বিৰোধী নীতি, দুৰ্নীতি-কেলেংকাৰীসমূহ ৰাইজৰ আগত তুলি ধৰাৰ উদ্দেশ্যে “যুৱ জাগৰণ যাত্ৰা”ৰ নামত প্ৰচাৰ কৰাৰ অন্তত ১৫ ছেপ্টেম্বৰ দিনৰ ১১ বজাত গুৱাহাটীৰ চচলত যুৱ সমাৱেশৰ আহ্বান কৰিছে সংগঠনটোৱে।
