অগ্নিগৰ্ভৰ মণিপুৰৰ পৰিস্থিতি সম্পূৰ্ণৰূপে এতিয়াও শাম কটা নাই। হিংসাত্মক ঘটনাৰ পৰিপ্ৰেক্ষিতত এতিয়াও অশান্ত হৈ আছে ৰাজ্যখন। তাৰ মাজতে কিছু সফলতা লাভ কৰিছে মণিপুৰ প্ৰশাসনে।
জনগোষ্ঠীয় সংঘাতে জুৰুলা কৰাৰ সময়তে মণিপুৰৰ বহুকেইখন থানাৰ পৰা লুটপাত কৰি নিছিল বৃহৎ সংখ্যক মাৰণাস্ত্ৰ। ইয়াৰ ফলশ্ৰুতিত তীব্ৰ সমালোচনাৰ সন্মুখীন হৈছিল মণিপুৰ চৰকাৰ।
এনে সমালোচনাৰ মাজতে হেৰুওৱা অস্ত্ৰভাণ্ডাৰৰ কিছু মাৰণাস্ত্ৰ উদ্ধাৰ কৰিবলৈ হৈছে অসম ৰাইফলছ আৰু মণিপুৰ পুলিচ। চুৰাচান্দপুৰ জিলাত আজি অসম ৰাইফলছ আৰু আৰক্ষীৰ যৌথ অভিযানত উদ্ধাৰ হৈছে কিছু মাৰণাস্ত্ৰ।
প্ৰকাশিত খবৰ অনুসৰি, অভিযানকাৰী দলটোৱে এটা ৭.৬২ মিমি এছ এল আৰ, এটা ৯ এম এম কাৰ্বাইন, আৰু এটা ৯ এম এম পিষ্টলকে ধৰি মেগজিনসহ কিছু অস্ত্ৰ উদ্ধাৰ কৰে।
উদ্ধাৰ হোৱা আগ্নেয়াস্ত্ৰসমূহ অধিক তদন্তৰ বাবে সিংঘাট থানাত গতাই দিয়া হৈছে বুলি জানিব পৰা গৈছে। ইফালে নিৰাপত্তা বাহিনীয়ে মণিপুৰৰ ইম্ফল-পশ্চিম, ইম্ফল-পূব, কংপোকপি আৰু চুৰাচান্দপুৰ জিলাৰ ফ্ৰিঞ্জ আৰু দুৰ্বল অঞ্চলতো তালাচী অভিযান চলায়।
ইম্ফল ইষ্ট আৰু চুৰাচান্দপুৰ জিলাৰ পৰা উদ্ধাৰ হৈছে চাৰিটা অস্ত্ৰ, চাৰিটা গুলী, আৰু এটা বিস্ফোৰক। এই সময়ছোৱাত ইম্ফল পশ্চিম, ইম্ফল পূব, আৰু থৌবাল জিলাতো সোতৰটা বাংকাৰ ভাঙি পেলোৱা হয়।
