পুনৰ উত্থাপিত হৈছে মহিলাৰ সুৰক্ষাৰ প্ৰশ্ন। এগৰাকী মহিলা কেব চালকক নিৰ্যাতন চলোৱাৰ অভিযোগ উত্থাপন হৈছে এগৰাকী যাত্ৰীৰ বিৰুদ্ধে। কলিকতাৰ গৰিয়াহাট থানাৰ আৰক্ষীয়ে গ্ৰেপ্তাৰ কৰিছে উত্তৰ প্ৰদেশৰ এজন বাসিন্দাক।
জানিব পৰা মতে, মঙলবাৰে দুপৰীয়াৰ ভাগত কলিকতা বিমানবন্দৰৰ পৰা এজন যাত্ৰীয়ে কেব বুকিং কৰিছিল। গৰিয়াহাটৰ এখন হোটেললৈ যাবলৈ বুলি কেব বুক কৰিছিল ব্যক্তিগৰাকীয়ে। কেব খনৰ চালক আছিল এগৰাকী মহিলা।
অভিযোগ অনুসৰি, মহিলা কেব চালকক দেখি গাত তৎ নাইকীয়া হ’ল যোগীৰাজ্যৰ যাত্ৰীজনৰ। পিছফালৰ পৰা চালকৰ আসনত বহি থকা মহিলা কেব চালকগৰাকীক বাৰে বাৰে চুবলৈ চেষ্টা কৰিলে যাত্ৰীগৰাকীয়ে।
কেৱল সেয়াই নহয়, অভিযুক্তই মহিলাগৰাকীক গালি-গালাজ কৰিবলৈ আৰম্ভ কৰিছিল। কেইবাবাৰো নিষেধাজ্ঞা আৰোপ কৰিও মহিলাগৰাকীৰ কথা নুশুনিলে অভিযুক্তই। অৱশেষত ভুক্তভোগীয়ে যাত্ৰীজনক কেবৰ পৰা নামিবলৈ কয়। কিন্তু দুনাই স্পৰ্শ নকৰো বুলি যাত্ৰীজনে তেওঁক আশ্বাস দি হোটেল পালেহি।
কিন্তু ইয়াতেই শেষ নহয়। মহিলা চালকগৰাকীয়ে দাবী কৰিছে যে যাত্ৰীগৰাকীক গন্তব্যস্থানত থৈ ঘূৰি অহাৰ পিছৰে পৰা অবিৰতভাৱে মহিলাগৰাকীলৈ মেছেজ প্ৰেৰণ কৰি আহিছে যাত্ৰীগৰাকীয়ে। ইটোৰ পিছত সিটো বেয়া মেচেছ প্ৰেৰণ কৰে যাত্ৰীগৰাকীয়ে।
ইয়াৰ পিছতে মহিলা চালকগৰাকীয়ে অনলাইন কেব অপাৰেটৰ গিল্ডক সমগ্ৰ ঘটনাৰ খবৰ দিয়ে। তাৰপিছত মঙলবাৰে নিশা হোটেলখনৰ সন্মুখলৈ গৈ গিল্ডৰ সদস্যসকলে মহিলাগৰাকীৰ দ্বাৰা ফোন কৰি যাত্ৰীগৰাকীক হোটেলৰ তললৈ মাতিছিল। মহিলা কেব চালকগৰাকীৰ নিমন্ত্ৰণত যাত্ৰীগৰাকী তালৈ অহাৰ লগে লগে তেওঁক গ্ৰেপ্তাৰ কৰি গৰিয়াহাট থানাত গতাই দিয়ে।
মহিলাগৰাকীৰ লিখিত অভিযোগৰ ভিত্তিত আৰক্ষীয়ে অভিযুক্তক গ্ৰেপ্তাৰ কৰে। মহিলাগৰাকীয়ে অভিযোগ কৰি কয় যে, ‘‘তেওঁ মোৰ পিছৰ চিটৰ পৰা বাৰে বাৰে চুই আছিল। মই তেওঁক কৈছিলো আপুনি নামি যাওক। ভাড়া দিব নালাগে। তাৰ পিছত তেওঁ ক’লে যে মই আৰু এনেকুৱা নকৰোঁ। মোক গন্তব্য স্থানত থৈ আহকগৈ। মই তেখেতক গৰিয়াহাটৰ এখন হোটেলত থৈ অহাৰ পিছত মোক অবিৰতভাবে মেছেজ কৰি আহিছে। লগতে অশ্লীল অফাৰো প্ৰদান কৰিছে। তাৰ পিছত ইউনিয়নক খবৰ দিলোঁ। পিছত আৰক্ষীৰ ওচৰত অভিযোগ দিলোঁ।”
খবৰ অনুসৰি, উত্তৰ প্ৰদেশৰ যাত্ৰীগৰাকীক গ্ৰেপ্তাৰ কৰি ন্যায়িক প্ৰক্ৰিয়া আগবঢ়াই নিছে গৰিয়াহাট আৰক্ষীয়ে।
