অহা ৫ অক্টোবৰৰ পৰা আৰম্ভ হ’ব এদিনীয়া ক্ৰিকেট বিশ্বকাপ। আগন্তুক ক্ৰিকেট বিশ্বকাপৰ উন্মাদনাই স্পৰ্শ কৰিছে ক্ৰিকেট অনুৰাগীক। ভৱিষ্যত বাণীৰে ক্ৰিকেট অনুৰাগীক আন এক শিহৰণ অনুভৱ কৰাইছে ক্ৰিকেট বিশেষজ্ঞসকলে।
বিশ্বকাপৰ স্বৰ্ণিল ট্ৰফীত কোনে আঁকিব চুম্বন- এই লৈ ইতিমধ্যে বিশেষজ্ঞসকলে নিজ নিজ দৃষ্টিভংগীৰে ভৱিষ্যত বাণী আগবঢ়াইছে। কিংবদন্তি ভাৰতীয় ক্ৰিকেটাৰ সুনীল গাভাস্কাৰেও কৰিছে আগন্তুক বিশ্বকাপৰ সম্ভাৱ্য বিজয়ী সন্দৰ্ভত পূৰ্বানুমান।
ভাৰতত অনুষ্ঠিত হ’বলগীয়া এইবাৰৰ বিশ্বকাপত ঘৰুৱা দলটোক হট ফেভাৰিট হিচাপে গণ্য কৰা হৈছে। ২০১১ ৰ পুনৰাবৃত্তিৰে ভাৰতে বিশ্বকাপ জয় কৰিব বুলি পূৰ্বানুমান কৰিছে বহু ক্ৰিকেট বিশেষজ্ঞই। পিছে গাভাস্কাৰে এইক্ষেত্ৰত ভাৰততকৈ আগস্থান দিছে আন এক দলকহে।
গাভাস্কাৰৰ মতে, আগন্তুক বিশ্বকাপতো আটাইতকৈ হট ফেভাৰিট ডিফেণ্ডিং চেম্পিয়ন ইংলেণ্ড। এই সন্দৰ্ভত তেওঁ আগবঢ়াইছে মতামতো। তেওঁৰ ভাষ্যৰ অনুসৰি, জ’ছ বাটলাৰ নেতৃত্বাধীন দলটোত এক ভয়ংকৰ বলিং লাইন আপৰ লগতে আছে তিনিজন বিশ্বমানৰ অল-ৰাউণ্ডাৰ।
এই বলিং লাইন আপ তথা অল-ৰাউণ্ডাৰসকলে যিকোনো মুহূৰ্ততে মেচৰ দিশ সলনি কৰিব পাৰে বুলি গাভাস্কাৰে মন্তব্য কৰে। তদুপৰি দলটোৰ বেটিং লাইন আপতো আছে প্ৰতিভাশালী বেটাৰ। গতিকে ইংলেণ্ডেই গাভাস্কাৰৰ দৃষ্টিত আটাইতকৈ সম্ভাৱনাপূৰ্ণ দল হিচাপে তেওঁ উল্লেখ কৰে।
