ঘাইপথ প্ৰকল্পৰ বাবে পুৰণি গছ নাকাটিবলৈ চৰকাৰ আৰু ৰাষ্ট্ৰীয় ঘাইপথ প্ৰাধিকৰণক আহ্বান জনাইছে আন্তঃৰাষ্ট্ৰীয় খ্যাতি সম্পন্ন অভিনেতা আদিল হুছেইনে।
আদিল হুছেইনে অসম চৰকাৰ আৰু ভাৰতীয় ৰাষ্ট্ৰীয় ঘাইপথ প্ৰাধিকৰণে নামনি অসমত চাৰিশৰীয়া ঘাইপথ নিৰ্মাণৰ বাবে ২০০০ ৰো অধিক গছ কাটিবলৈ লোৱাৰ পৰিকল্পনাক লৈ উদ্বেগ প্ৰকাশ কৰিছে।
এক ভিডিঅ’ বাৰ্তাযোগে হুছেইনে কয় যে গুৱাহাটীৰ পৰা গোৱালপাৰালৈ যোৱা পথটোৰ কাষৰ সেউজীয়া গছ-গছনিবোৰৰ সৈতে তেওঁৰ এক শক্তিশালী সম্পৰ্ক আছে। পথৰ দাঁতিত থকা কেইবা শতিকা পুৰণি গছবোৰৰ অবিহনে তেওঁ ঘৰলৈ যোৱাৰ কথা কল্পনাও কৰিব নোৱাৰে।
ইয়াৰ লগতে হুছেইনে বিশ্বৰ উন্নত দেশসমূহ ভ্ৰমণ কৰাৰ অভিজ্ঞতাও ব্যক্ত কৰে। উন্নত দেশবোৰত অহৰহ বৰষুণ হোৱাৰ পিছতো ৰাস্তা-ঘাট মেৰামতিৰ প্ৰয়োজন নহয় বুলি ব্যক্ত কৰে অভিনেতাগৰাকীয়ে।
হুছেইনে অসম চৰকাৰ আৰু ৰাষ্ট্ৰীয় ঘাইপথ প্ৰাধিকৰণক তেওঁলোকৰ পৰিকল্পনা পুনৰ বিবেচনা কৰি গছ-গছনি নষ্ট নকৰাকৈ ঘাইপথ নিৰ্মাণৰ উপায় বিচাৰি উলিয়াবলৈ আহ্বান জনায়।
গছ-গছনি ৰক্ষাৰ বাবে চলচ্চিত্ৰ নিৰ্মাতা ৰীমা দাসৰ জনোৱা আহ্বানক তেওঁ প্ৰশংসা কৰি তেওঁ লগতে কয় যে অসমীয়া জনসাধাৰণে হলেণ্ডৰ দৰে উন্নত দেশৰ আদৰ্শ অনুসৰণ কৰিব লাগে, য’ত গছ কটাৰ বাবে কৰ্তৃপক্ষক জবাবদিহি কৰা হয়।
“প্ৰথম বিশ্বৰ দেশসমূহে উন্নয়ন সাধন কৰিবলৈ গছ নাকাটে। তেওঁলোকে নিজৰ গছ-গছনি, জলাশয় আৰু পৰিৱেশৰ যত্ন লয়। হলেণ্ডৰ দৰে ঠাইত যিকোনো কাৰণত গছ কাটিলে কৰ্তৃপক্ষই জনসাধাৰণৰ ওচৰত জবাবদিহি হয়।’’ – অভিনেতাগৰাকীয়ে এইদৰে কয়।
হুছেইনে উল্লেখ কৰে যে এই পুৰণি গছবোৰত কুঠাৰ নমৰাকৈও ৩৭ নং ৰাষ্ট্ৰীয় ঘাইপথ নিৰ্মাণ সম্ভৱ।
আন্তঃৰাষ্ট্ৰীয় খ্যাতিসম্পন্ন চলচিত্ৰ নিৰ্মাতা ৰীমা দাস আৰু অভিনেতা আদিল হুছেইনৰ এই অনুৰোধক অসম চৰকাৰ আৰু ৰাষ্ট্ৰীয় ঘাইপথ প্ৰাধিকৰণে কিমান গুৰুত্ব সহকাৰে ল’ব সেয়া সময়ত লক্ষনীয় হ’ব।
