জম্মু-কাশ্মীৰৰ ৰাজৌৰী জিলাত বুধবাৰে সূত্ৰপাত হোৱা নিৰাপত্তা বাহিনী আৰু সন্ত্ৰাসবাদীৰ সংঘৰ্ষত নিহত সেনা কৰ্মীৰ সংখ্যা চাৰিজনলৈ বৃদ্ধি পাইছে। সন্ত্ৰাসবাদীৰ গুলীত নিহত হৈছে সেনাবাহিনীৰ দুজন বিষয়া আৰু দুজন জোৱান।
আনহাতে আন তিনিজন জোৱান এই সংঘৰ্ষত আহত হোৱা বুলি জানিব পৰা গৈছে। প্ৰথম অৱস্থাত সংঘৰ্ষস্থলীত কেপ্তেইন ৰেংকৰ এজন সেনা বিষয়া আৰু এজন জোৱান নিহত হোৱা বুলি বাতৰি প্ৰকাশ পাইছিল।
উল্লেখ্য যে, ৰাজৌৰী জিলাৰ বাজী মলৰ বনাঞ্চলত সন্ত্ৰাসবাদীৰ উপস্থিতিৰ বিষয়ে চোৰাংচোৱা তথ্য লাভ কৰাৰ পিছতে সেনা বাহিনী আৰু আৰক্ষীয়ে যৌথ অভিযান আৰম্ভ কৰিছিল।
এই অভিযানৰ সময়তে দুয়োপক্ষৰ মাজত হোৱা গুলীবৰ্ষণত সেনা বিষয়া তথা জোৱানকেইগৰাকী শ্বহীদ হয়। সন্ত্ৰাসবাদী কেইগৰাকীক নিৰ্মূল কৰিবলৈ অঞ্চলটোত অতিৰিক্ত সৈন্য নিয়োগ কৰা হৈছে আৰু অভিযান তীব্ৰতৰ হৈ পৰা বুলি সদৰী কৰা হৈছে।
এই সংঘৰ্ষত আহতসকলক উধামপুৰৰ আৰ্মী কমাণ্ড হাস্পতাললৈ তাৎক্ষণিকভাৱে প্ৰেৰণ কৰা হয়। সূত্ৰ অনুসৰি, দেওবাৰৰ পৰাই অঞ্চলটোত সন্ত্ৰাসবাদী দুজনক দেখিবলৈ পোৱা গৈছিল। আনকি পূজাস্থলীত আশ্ৰয় বিচাৰিছিল দুয়ো।
ইফালে স্থানীয় বাসিন্দাসকলে জানিবলৈ দিয়া মতে, দেওবাৰৰ পৰা অঞ্চলটোত নিৰাপত্তাৰক্ষীৰ অভিযান চলি আছে। অভিযানৰ বাবে গাঁৱৰ লোকসকলক ঘৰৰ ভিতৰতে থাকিবলৈ নিৰ্দেশ দিয়া হৈছে তথা আৰু শিশুসকলে বিদ্যালয়ত যোৱাৰ পৰা বিৰত ৰখা হৈছে।
