চাকৰি দিয়াৰ প্ৰলোভনেৰ বাবে এজন যুৱকে এগৰাকী মহিলাক ধৰ্ষণ কৰি হত্যা কৰাৰ অভিযোগ পোহৰলৈ আহিছে।
পথৰ কাষৰ পৰা উদ্ধাৰ হৈছ মহিলা গৰাকীৰ ৰক্তাক্ত মৃতদেহ।
এই ঘটনা ৩ ডিচেম্বৰত উত্তৰ প্ৰদেশৰ চুলতানপুৰত সংঘটিত হয়। ইতিমধ্যে এই ঘটনাৰ মূল অভিযুক্তক গ্ৰেপ্তাৰ কৰিছে আৰক্ষীয়ে। ভাৰতীয় দণ্ডবিধিৰ কেইবাটাও ধাৰাত তেওঁৰ বিৰুদ্ধে গোচৰ ৰুজু কৰা হৈছে বুলি আৰক্ষীয়ে জানিবলৈ দিছে।
আৰক্ষীৰ সূত্ৰ অনুসৰি নিৰ্যাতনৰ বলি হোৱা মহিলাগৰাকীয়ে অভিযুক্ত যুৱকজনক চাকৰি দিয়াৰ প্ৰতিশ্ৰুতি দিছিল।
অভিযুক্তই আৰক্ষীক জনোৱা মতে, মহিলাগৰাকীয়ে তেওঁক চাকৰি দিয়াৰ প্ৰতিশ্ৰুতি দি তেওঁৰ পৰা ধন লৈছিল। কিন্তু মহিলাগৰাকীয়ে ধন লোৱাৰ পিছতো চাকৰিটো দিব নোৱাৰিলে।
শেহতীয়াকৈ মহিলাগৰাকীৰ সৈতে কাজিয়া হৈছিল অভিযুক্তৰ। মহিলাগৰাকীৰ পৰা ধন ঘূৰাই দাবী কৰিছিল অভিযুক্তই। কিন্তু মহিলাগৰাকীয়ে অভিযুক্তক কিছুদিন অপেক্ষা কৰিবলৈ কয়। কিন্তু ধন নাপাই এই নিৰ্মম কাণ্ড সংঘটিত কৰিলে যুৱকজনে।
আৰক্ষীৰ তথ্য অনুসৰি যুৱকজনে মহিলাগৰাকীক ধৰ্ষণ কৰি জ্বলি থকা চিগাৰেট এটা মুখত লগাই দিয়ে। ইয়াৰ পিছত কুঠাৰেৰে কাটি হত্যা কৰে।
ইয়াৰ কিছুদিন পিছতে চুলতানপুৰৰ পথৰ দাঁতিৰ পৰা উদ্ধাৰ হয় মহিলাগৰাকীৰ ৰক্তাক্ত মৃতদেহ।
ঘটনা সন্দৰ্ভত গোচৰ ৰুজু কৰাৰ উপৰিও আৰক্ষীয়ে অভিযুক্তক গ্ৰেপ্তাৰ কৰে। এখন ই-ৰিক্সা, এটা মোবাইল ফোন আৰু হত্যাকাণ্ডত ব্যৱহৃত কুঠাৰ উদ্ধাৰ কৰা হৈছে বুলি আৰক্ষীয়ে জানিবলৈ দিয়ে।
