আৰ্থিক সমস্যাত জুৰুলা হৈ এহাল দম্পতীয়ে লোৱা চৰম সিদ্ধান্তই শোকস্তব্ধ কৰি তুলিছে কৰ্ণাটকক। ৰাজ্যখনৰ এহাল দম্পতীয়ে আৰ্থিক অভাৱৰ ভৰ সহ্য কৰিব নোৱাৰি নিজৰ ১১ বছৰীয়া সন্তানক হত্যা কৰি নিজেও কৰিছে আত্মহত্যা।
এই দুখজনক ঘটনাই সংবাদ শিৰোনাম দখল কৰাৰ লগতে সামাজিক মাধ্যমতো শোকৰ ছাঁ পেলাইছে। প্ৰকাশিত খবৰ অনুসৰি, দম্পতীহালে সন্তানৰ সৈতে কোডাগুৰ এখন ৰিজ’ৰ্টত ফুৰিবলৈ গৈ ৰিজ’ৰ্টতে লয় এই চৰম পন্থা।
এই চৰম পন্থা গ্ৰহণ কৰা পৰিয়ালটো কেৰালাৰ কোট্টায়মৰ বুলি জানিব পৰা গৈছে। শনিবাৰে পুৱা পৰিয়ালটো কোডাগুৰ ৰিজ’ৰ্টত খনত উপস্থিত হৈছিল। আজি পুৱা কোঠাৰ ভিতৰত উদ্ধাৰ হয় পৰিয়ালটোৰ আটাইকেইগৰাকী লোকৰে মৃতদেহ।
ঘটনাৰ বিষয়ে জানিব পাৰি ৰিজ’ৰ্ট কৰ্তৃপক্ষই আৰক্ষীক খবৰ দিয়ে আৰু আৰক্ষী ঘটনাস্থলীত উপস্থিত হৈ মৃতদেহকেইটা উদ্ধাৰ কৰে। নিহত পৰিয়ালটোৰ সদস্যসকলক বিনোদ (৪৩), জুবি আব্ৰাহাম (৩৭) আৰু জোহান (১১) বুলি চিনাক্ত কৰে আৰক্ষীয়ে।
আৰক্ষীয়ে লগে লগে মৃতদেহ কেইটা মৰণোত্তৰ পৰীক্ষাৰ বাবে প্ৰেৰণ কৰে। এগৰাকী বিষয়াই সদৰী কৰা মতে, ৰিজ’ৰ্টখনৰ কোঠাটোৰ পৰা আৰক্ষীয়ে এখন চুইচাইড নোট উদ্ধাৰ কৰে।
চুইচাইড নোটখনত তীব্ৰ আৰ্থিক সংকটৰ বিষয়ে উল্লেখ থকা জানিবলৈ দিয়ে আৰক্ষী বিষয়াগৰাকীয়ে। ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে। মৃতকৰ পৰিয়ালৰ লোকক এই ঘটনাৰ বিষয়ে অৱগত কৰা বুলি বিষয়াগৰাকীয়ে সদৰী কৰে।
