এগৰাকী ছাত্ৰই ‘ৰাম ৰাম’ বুলি দিয়া অভিবাদনৰ উত্তৰ নিদিয়াৰ বাবে বিদ্যালয়ৰ পৰা বৰ্খাস্ত কৰিলে এজন শিক্ষকক। উত্তৰ প্ৰদেশৰ হাথৰছ জিলাত সংঘটিত হৈছে এই ঘটনা।
উত্তৰ প্ৰদেশৰ হাথৰাছ জিলাৰ পাৰছাৰা অঞ্চলৰ ছাইমা মনছুৰ পাব্লিক স্কুলত সংঘটিত হৈছে এই ঘটনা।
বিদ্যালয়ৰ সূত্ৰ অনুসৰি যোৱা বৃহস্পতিবাৰে একাদশ শ্ৰেণীৰ এজন ছাত্ৰই শিক্ষক মহম্মদ আদনানক দেখি ‘ৰাম ৰাম’ বুলি সম্ভাষণ জনায়। প্ৰত্যুত্তৰত শিক্ষকে একো নক’লে। যাৰ বাবে ছাত্ৰগৰাকীক বিদ্যালয়ৰ পৰা বহিষ্কাৰ কৰা হৈছে।
বিদ্যালয়ৰ ঘটনাই ইতিমধ্যে সাম্প্ৰদায়িকতাৰ ৰূপ লৈছে। শনিবাৰে বিদ্যালয়ৰ গেটত হনুমান চলিছা আবৃত্তি কৰে উগ্ৰ হিন্দু সংগঠনে। এটা বৃহৎ আৰক্ষী বাহিনী উপস্থিত হৈ পৰিস্থিতি নিয়ন্ত্ৰণ কৰে।
বিদ্যালয়ৰ অধ্যক্ষ ছলমান কিৰৱাইয়ে কয়, ‘যোৱা ৩০ বছৰত এনে ঘটনা দেখা নাই। আমাৰ বিদ্যালয়ত সকলো ধৰ্মৰ ছাত্ৰ-ছাত্ৰীয়ে পঢ়ে। কোনো জাতিৰ কথা নাই’।
পৰিস্থিতি উত্তপ্ত হোৱাৰ লগে লগে বিদ্যালয়ৰ অধ্যক্ষই শিক্ষকজনক চাকৰিৰ পৰা বৰ্খাস্ত কৰিবলৈ বাধ্য হয়। লগতে ভৱিষ্যতে এনে অপ্ৰীতিকৰ ঘটনা সংঘটিত নহয় বুলিও তেওঁ আশ্বাস দিয়ে। ছলমান কিৰবাইয়েও সমগ্ৰ বিষয়টোৰ তদন্তৰ বাবে এখন কমিটী গঠন কৰাৰ কথা কৈছে।
হাথৰাছৰ এ এছ পিয়ে কয়, ‘ছ’চিয়েল মিডিয়াৰ জৰিয়তে এই ঘটনাৰ বিষয়ে জানিবলৈ পাইছিলো। আৰক্ষীয়ে তদন্ত আৰম্ভ কৰিছে। জিলা দণ্ডাধীশে তদন্তৰ বাবে এটা পেনেল গঠন কৰিছে। এই পেনেলত আছে এজন এছডিএম আৰু এজন জিলা প্ৰাথমিক শিক্ষা বিষয়া। অতি সোনকালে উপযুক্ত ব্যৱস্থা গ্ৰহণ কৰা হ’ব’।
