দেশৰ প্ৰখ্যাত ন্যায়বিদ তথা উচ্চতম ন্যায়ালয়ৰ জ্যেষ্ঠ অধিবক্তা ফালি এছ নৰিমানে আজি শেষ নিশ্বাস ত্যাগ কৰে। মৃত্যুৰ সময়ত তেওঁৰ বয়স আছিল ৯৫ বছৰ। দিল্লীৰ নিজ গৃ্হত মৃত্যু হয় জ্যেষ্ঠ ন্যায়বিদগৰাকীৰ।
তেওঁ ১৯৭১ চনৰ পৰা উচ্চতম ন্যায়ালয়ৰ জ্যেষ্ঠ অধিবক্তা হিচাপে কাৰ্যনিৰ্বাহ কৰি ১৯৯১ চনৰ পৰা ২০১০ চনলৈ ভাৰতীয় উকীল সন্থাৰ সভাপতি হিচাপেও কাৰ্যনিৰ্বাহ কৰিছিল।
নৰিমানে ১৯৯৪ চনৰ পৰা ইণ্টাৰনেশ্যনেল কাউন্সিল ফৰ কমাৰ্চিয়েল আৰ্বিট্ৰেশ্যন অধ্যক্ষ হিচাপে, ১৯৮৯ চনৰ পৰা আন্তঃৰাষ্ট্ৰীয় বাণিজ্য পৰিষদৰ ইণ্টাৰনেল ক’ৰ্ট অৱ আৰ্বিট্ৰেশ্যনৰ উপ-সভাপতি হিচাপে কাৰ্যনিৰ্বাহ কৰিছিল।
তদুপৰি ১৯৯৫ চনৰ পৰা ১৯৯৭ চনলৈকে জেনেভাত থকা আন্তঃৰাষ্ট্ৰীয় আইনবিদ আয়োগৰ কাৰ্যবাহী সমিতিৰ অধ্যক্ষৰ লগতে আন কেইবাটাও গুৰুত্বপূৰ্ণ পদত কাৰ্যনিৰ্বাহ কৰিছিল।
বিশিষ্ট আইনবিদগৰাকী্ক ১৯৯১ চনত পদ্মভূষণ আৰু ২০০৭ চনত পদ্ম বিভূষণ সন্মানেৰে সন্মানিত কৰা হৈছিল।তেখেতে দেশৰ ন্যায় ব্যৱস্থা সন্দৰ্ভত কেইবাখনো অমূল্য গ্ৰন্থ লিখি উলিয়াইছিল।
ইণ্ডিয়াছ লিগেল চিষ্টেম, গড চেভ দ্য অনাৰেবল চুপ্ৰিম ক’ৰ্ট, দ্য ষ্টেট অৱ দ্য নেচন, দ্য কনষ্টিটিউশ্যন অৱ ইণ্ডিয়া তেখেতৰ দ্বাৰা লিখিত গ্ৰন্থ। ’বিফৰ মেমৰী ফেডছ্ নামেৰে তেওঁ এখন আত্মজীৱনীও প্ৰকাশ কৰিছিল।
তেখেতৰ মৃত্যুত এটা যুগৰ অৱসান হোৱা বুলি উল্লেখ কৰে জ্যেষ্ঠ অধিবক্তা অভিষেক মনু সিংভীয়ে। প্ৰধানমন্ত্ৰী নৰেন্দ্ৰ মোদীয়েও আইনবিদগৰাকীৰ মৃত্যুত শোক প্ৰকাশ কৰি অন্তিম শ্ৰদ্ধা জনায়।
