৬৪ বছৰ বয়সতো চফল ডেকাৰ দৰে হৈ আছে দেশৰ সৰ্ব্বোচ্চ ন্যায়ালয়ৰ মুখ্য ন্যায়াধীশ ডি ৱাই চন্দ্ৰচূড়। প্ৰতিদিনে আইন-আদালতৰ জটিল চাপ আৰু অত্যধিক ব্যস্ততাপূৰ্ণ জীৱনৰ লগত মোকাবিলা কৰাৰ পিছতো আচৰিতভাবে মুখমণ্ডল আৰু শৰীৰত বয়সৰ চাপ পৰা নাই ন্যায়াধীশ গৰাকীৰ।
কেনেকৈ ইমান ফিট হৈ আছে ডি ৱাই চন্দ্ৰচূড়! মুখ্য ন্যায়াধীশে নিজেই উদঙাই দিছে তেওঁৰ সুস্থ স্বাস্থ্য আৰু সুস্থ মনৰ ৰহস্য।
সময়ৰ কাম সময়ত কৰি ভাল পায় চন্দ্ৰচূড়ে। মুখ্য ন্যায়াধীশগৰাকীয়ে একেবাৰে ভাল নাপায় এলাহ। ৰাতিপুৱা ঠিক ৩:৩০ বজাতে বিচনা ত্যাগ কৰে তেওঁ। তাৰ পিছত যোগাসন আৰু ধ্যানত বহে।
ব্যায়ামৰ পিছত নিয়ম অনুসৰি খাদ্য গ্ৰহণ কৰে চন্দ্ৰচূড়ে। যোৱা পাঁচ মাহ ধৰি আমিষ খাদ্য মুখত দিয়া নাই ন্যায়াধীশগৰাকীয়ে। সাত্ত্বিক জীৱন যাপনৰ লগতে সাত্ত্বিক খাদ্য গ্ৰহণ কৰিছে তেওঁ। এই নিয়ম মানি চলি তেওঁ মানসিক চাপ নিয়ন্ত্ৰণত ৰাখিছে।
মুখ্য ন্যায়াধীশ চন্দ্ৰচূড়ে কয়, “মই কভিডত আক্ৰান্ত হোৱাৰ পিছৰে পৰা মোৰ জীৱনশৈলী সলনি কৰিছো। প্ৰধানমন্ত্ৰী নৰেন্দ্ৰ মোদীয়ে মোক আয়ুষ আৰু আয়ুৰ্বেদৰ উপকাৰিতাৰ বিষয়ে কোৱাৰে পৰা মই আয়ুৰ্বেদ, যোগ, প্ৰাকৃতিক চিকিৎসা, ইউনানি, সিদ্ধ আৰু হোমিঅ’পেথীৰ ওপৰত নিৰ্ভৰ কৰি আহিছো। নিয়মিতভাৱে ৰাতিপুৱা সোনকালে উঠি ব্যায়াম কৰো। সাত্ত্বিক জীৱন যাপন কৰোঁ।”
মুখ্য ন্যায়াধীশ চন্দ্ৰচুদে কয়, আপুনি কি খায় আৰু কিমান খায় সেয়া অতি গুৰুত্বপূৰ্ণ। আপোনাৰ শৰীৰৰ স্বাস্থ্য আপুনি খোৱা খাদ্যৰ ওপৰত নিৰ্ভৰ কৰে।
উল্লেখ্য যে মুখ্য ন্যায়াধীশ ডি ৱাই চন্দ্ৰচুড়ে আয়ুছ হোলিষ্টিক ৱেলনেছ চেণ্টাৰ সৃষ্টিত উদ্যোগ লৈছে। তেওঁ কয় যে ঘৰৰ বাহিৰত মানসিক চাপ কমোৱাৰ বাবে সুস্থ আৰু সুন্দৰ জীৱনশৈলীৰ লগত অভ্যস্ত হোৱাটো প্ৰয়োজনীয়। জীয়াই থকাৰ ক্ষেত্ৰত নিয়ম থাকিব লাগে। তেতিয়াহে বৰ্তমানৰ প্ৰতিযোগিতাত জীয়াই থকাটো সম্ভৱ হ’ব।
আদালতৰ পৰা ঘৰলৈ উভতি অহাৰ পিছত প্ৰতিদিনে গান শুনাটো চন্দ্ৰচূড়ৰ অভ্যাসত পৰিণত হৈছে। বহু গুৰুত্বপূৰ্ণ গোচৰ প্ৰায় প্ৰতিদিনে চম্ভালিবলগীয়া হয়। মুখ্য ন্যায়াধীশগৰাকীয়ে কয় যে যোগ, ধ্যান আৰু সংগীতএ তেওঁক সদায় মানসিক শান্তি দিয়ে।
