বিদেশীৰ ভূমিত নিজ দেশৰ সন্মান ধূলিৰ লগত মিহলি কৰিছে পাকিস্তানৰ এগৰাকী বক্সাৰে। নাম তেওঁৰ জোহাইব ৰছিদ। প্ৰতিশ্ৰুতিসম্পন্ন বক্সাৰজনে যোৱা বছৰৰ এছিয়ান বক্সিং চেম্পিয়নশ্বিপত ব্ৰঞ্জৰ পদক জয় কৰি পাকিস্তানত উদীয়মান প্ৰতিভা হিচাপে চৰ্চিত হৈছিল।
পিছে আৰম্ভণিতেই যেন ধূলিস্যাৎ হ’ল ৰছিদৰ কেৰিয়াৰৰ ভৱিষ্যত! সেয়াও চুৰিৰ অভিযোগত। ইটালীত এখন প্ৰতিযোগিতাৰ বাবে গৈ নিজৰ এগৰাকী সতীৰ্থৰ বেগৰ পৰা ধন চুৰি কৰাৰ অভিযোগ উত্থাপন হৈছে জোহাইব ৰছিদৰ বিৰুদ্ধে।
পাকিস্তানৰ এমেচাৰ বক্সিং ফেডাৰেচনে আজি প্ৰকাশ কৰা অনুসৰি ইটালীত এজন সতীৰ্থৰ বেগৰ পৰা ধন চুৰি কৰি নিৰুদ্দেশ হৈছে বক্সাৰজন। অলিম্পিকৰ যোগ্যতা অৰ্জনৰ প্ৰতিযোগিতাত অংশগ্ৰহণ কৰিবলৈ ইটালীলৈ গৈছিল জোহাইব ৰছিদ।
ফেডাৰেচনৰ এজন জ্যেষ্ঠ বিষয়াই উল্লেখ কৰা মতে তেওঁলোকে বিষয়টো ইটালীত থকা পাকিস্তান দূতাবাসৰ দৃষ্টিগোচৰ কৰিছে আৰু লগতে এই সন্দৰ্ভত আৰক্ষীৰ প্ৰতিবেদন দাখিল কৰিছে।
জোহাইব ৰছিদে যি ধৰণে আচৰণ কৰিছে সেয়া ফেডাৰেচন আৰু দেশৰ বাবে আটাইতকৈ লজ্জাজনক বুলি অভিহিত কৰিছে ৰাষ্ট্ৰীয় ফেডাৰেচনৰ সম্পাদক কৰ্ণেল নাছিৰ আহমেদে।
তেওঁ লগতে উল্লেখ কৰা মতে, দলটোৰ এগৰাকী মহিলা বক্সাৰ ল’ৰা ইক্ৰাম প্ৰশিক্ষণৰ বাবে ওলাই যোৱাৰ সময়তে জোহাইবে ইক্ৰামৰ কোঠাৰ চাবি লৈ পাৰ্চৰ পৰা বিদেশী মুদ্ৰা চুৰি কৰি হোটেলৰ পৰা নিৰুদ্দেশ হয়।
এই সন্দৰ্ভত আৰক্ষীক অৱগত কৰা হৈছে আৰু সম্প্ৰতি জোহাইব ৰছিদৰ সন্ধান চলাই থকা হৈছে বুলি বিষয়াগৰাকীয়ে লগতে কয়। খেলুৱৈগৰাকী এতিয়ালৈকে কাৰো সৈতে যোগাযোগত নাই বুলিও নাছিৰ আহমেদে সদৰী কৰে।
