সমগ্ৰ দেশকে জোকাৰি যোৱা দিল্লীৰ নৃশংস শ্ৰদ্ধা ৱাকাৰ হত্যাকাণ্ডৰ বৰ্বৰতা হয়তো আজিও পাহৰিব পৰা নাই দেশবাসীয়ে। এই জঘন্য হত্যাকাণ্ডৰ ছাঁ পুনৰ দেখিবলৈ পোৱা গৈছে দেশৰ ৰাজধানী দিল্লীত।
এটা ঘৰৰ আলমাৰীৰ ভিতৰৰ পৰা উদ্ধাৰ হৈছে এগৰাকী যুৱতীৰ মৃতদেহ। যোৱা কেইবাদিনো ধৰি নিৰুদ্দিষ্ট হৈ থকাৰ পিছত পৰিয়ালৰ অভিযোগৰ ভিত্তিত আৰক্ষীৰ অভিযানৰ অন্তত যুৱতীগৰাকীৰ মৃতদেহ উদ্ধাৰ হয়।
প্ৰকাশিত খবৰ অনুসৰি যোৱা বুধবাৰে নিশা প্ৰায় ১০:৪০ বজাত দিল্লী আৰক্ষীয়ে লাভ কৰিছিল এক ফোনকল। ফোন যোগে যুৱতীগৰাকী নিৰুদ্দেশ হোৱাৰ অভিযোগ আৰক্ষীক দিছিল যুৱতীগৰাকীৰ পিতৃয়ে।
ইয়াৰ পিছতে আৰক্ষীয়ে ব্যক্তিজনৰ পৰা যুৱতীগৰাকীৰ ঠিকনা সংগ্ৰহ কৰি সেই অনুসৰি দ্বাৰকাৰ ৰাজপুৰীৰ ঠিকনাত উপস্থিত হয়। আৰক্ষীয়ে ঘৰটোত তালাচী চলোৱাৰ পিছতো যুৱতীগৰাকীক উদ্ধাৰ কৰিব পৰা নাছিল।
আৰক্ষীয়ে পিছত সন্দেহৱশতঃ আলমাৰীটো খোলাৰ মুহূৰ্ততে ভিতৰত উদ্ধাৰ হয় যুৱতীগৰাকীৰ মৃতদেহ। লগে লগে ফৰেনছিক দল ঘটনাস্থলীত উপস্থিত হয়। আনহাতে যুৱতীগৰাকীৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰে আৰক্ষীয়ে।
যুৱতীগৰাকীক কেতিয়া হত্যা কৰা হৈছিল, সেই বিষয়ে মৰণোত্তৰ পৰীক্ষাৰ পিছতহে জানিব পৰা হ’ব বুলি আৰক্ষীয়ে জানিবলৈ দিছে। ইফালে যুৱতীগৰাকীৰ পিতৃয়ে তেওঁৰ কন্যাক লিভ ইন পাৰ্টনাৰে হত্যা কৰা বুলি অভিযোগ তুলিছে।
লক্ষণীয়ভাৱে যুৱতীগৰাকীৰ লিভ ইন পাৰ্টনাৰো সম্প্ৰতি নিখোঁজ হৈ আছে। নিখোঁজ যুৱকজনৰ সন্ধান অব্যাহত আৰক্ষীয়ে। পিতৃৰ অভিযোগ অনুসৰি, শেষবাৰৰ বাবে তেওঁৰ কন্যাই ফোন কৰাৰ সময়ত লিভ ইন পাৰ্টনাৰে তেওঁক শাৰীৰিক নিৰ্যাতন চলোৱা বুলি জানিবলৈ দিছিল।
যুৱতীগৰাকীয়ে হত্যাৰ আশংকাও প্ৰকাশ কৰা বুলি পিতৃয়ে অভিযোগ কৰিছিল। তেতিয়াৰ পৰাই পৰিয়ালৰ সৈতে যুৱতীগৰাকীৰ যোগাযোগ হোৱা নাই বুলিও তেওঁ জানিবলৈ দিয়ে। নিহত যুৱতীগৰাকী বিগত ডেৰ মাহ ধৰি প্ৰেমিকৰ সৈতে দ্বাৰকাৰ এটা ভাড়াঘৰত আছিল।
অভিযুক্ত লিভ ইন পাৰ্টনাৰ বিপুল টেইলৰ নামৰ যুৱকজন চুৰাটৰ বাসিন্দা বুলি জানিব পৰা গৈছে। বিপুলৰ বিৰুদ্ধে ভাৰতীয় দণ্ডবিধিৰ ৩০২ (হত্যা) ধাৰাত গোচৰ ৰুজু কৰা হৈছে বুলি আৰক্ষীয়ে প্ৰকাশ কৰিছে।
