সোমবাৰে দিল্লী উচ্চ ন্যায়ালয়ে দিল্লীৰ মুখ্যমন্ত্ৰী অৰবিন্দ কেজৰিৱালক অপসাৰণৰ বাবে কৰা এখন আবেদনক ভৰ্ৎসনা কৰে। উচ্চ ন্যায়ালয়ে কয় যে এই কাম প্ৰচাৰৰ বাবে কৰা হৈছে। আমি আবেদনকাৰীৰ ওপৰত গধুৰ জৰিমনা বিহিম।
আম আদমী পাৰ্টীৰ প্ৰাক্তন বিধায়ক সন্দীপ কুমাৰে দিল্লী আবকাৰী নীতিৰ ধন সৰবৰাহ গোচৰত মুখ্যমন্ত্ৰী কেজৰিৱালক আঁতৰোৱাৰ বাবে আদালতৰ দ্বাৰস্থ হৈছিল৷
দিল্লী উচ্চ ন্যায়ালয়ৰ ন্যায়াধীশ সুব্ৰমনিয়ম প্ৰসাদে সন্দীপ কুমাৰৰ আবেদনক সমালোচনা কৰে।ইয়াৰ পূৰ্বে আন লোকে দাখিল কৰা অনুৰূপ দুখন আবেদন ইতিমধ্যে উচ্চ ন্যায়ালয়ে নাকচ কৰিছিল।
লগতে পঢ়কঃ পোহনীয়া হাতীৰ আক্ৰমণত পশ্চিম বংগৰ ইস্কন মন্দিৰত প্ৰাণ গ’ল অসমৰ মাউতৰ
দিল্লীৰ মুখ্যমন্ত্ৰী অৰবিন্দ কেজৰিৱালক ২১ মাৰ্চত ইডিয়ে আবকাৰী নীতিৰ গোচৰত গ্ৰেপ্তাৰ কৰে। ইয়াৰ পাছত আদালতে তেওঁক ১ এপ্ৰিলৰ ভিতৰত ইডিৰ জিম্মাত পঠিয়াইছিল। সেই জিম্মাৰ অন্ত পৰাৰ পিছত আদালতে ১৫ এপ্ৰিললৈকে ন্যায়িক জিম্মালৈ পঠিয়াইছিল। বৰ্তমান সময়ত কেজৰিৱাল তিহাৰ জেলত আছে।
গ্ৰেপ্তাৰৰ পাছৰে পৰা বিজেপিয়ে মুখ্যমন্ত্ৰীৰ পদৰ পৰা কেজৰিৱালৰ পদত্যাগৰ দাবী জনাই আহিছে। একে সময়তে আম আদমী পাৰ্টীয়ে স্পষ্ট কৰি দিছে যে কেজৰিৱালে মুখ্যমন্ত্ৰীৰ পদত অধিস্থিত থাকিব।
