কংগ্ৰেছে ৰাষ্ট্ৰপতি দ্ৰৌপদী মুৰ্মুলৈ পত্ৰ লিখি সৈনিক স্কুলসমূহক ৰাজনীতিৰ মাজলৈ টানি নানিবলৈ অনুৰোধ জনায়। কংগ্ৰেছৰ সভাপতি মল্লিকাৰ্জুন খাৰ্গেই এখন পত্ৰযোগে কয় যে সৈনিক স্কুল ৰাজনৈতিক সম্পৰ্ক থকা সংগঠনৰ হাতত যাতে গতাই দিয়া নহয়। তেওঁ কয় যে এনে পদক্ষেপে সৈনিক বিদ্যালয়সমূহৰ স্বাধীনতা আৰু স্বায়ত্তশাসনক ক্ষতিগ্ৰস্ত কৰে।
খাৰ্গেই লগতে কয় যে ভৱিষ্যতৰ প্ৰতিৰক্ষা কৰ্মীসকলৰ বাবে সৈনিক স্কুলসমূহ এক গুৰুত্বপূৰ্ণ প্ৰতিষ্ঠান। গতিকে তেওঁলোকক কোনো ধৰণে ৰাজনীতিলৈ টানি অনাটো উচিত নহয়।
কংগ্ৰেছৰ ৰাষ্ট্ৰীয় সভাপতি মল্লিকাৰ্জুন খাৰ্গেই ৰাষ্ট্ৰপতি দ্ৰৌপদী মুৰ্মুলৈ পত্ৰযোগে লিখিছে, সৈনিক স্কুলসমূহৰ বেচৰকাৰীকৰণ কৰা হৈছে। য’ত সৈনিক স্কুলসমূহ কোনোবা নহয় কোনোবা প্ৰকাৰে ৰাজনীতিৰ সৈতে জড়িত লোকৰ হাতত গতাই দিয়া হৈছে।
লগতে পঢ়কঃ IPL 2024: অথলে গ’ল ৰিয়ানৰ বিস্ফোৰক ইনিংছ; ৰুদ্ধশ্বাস মেচত গুজৰাটৰ জয়ৰ নায়ক ৰছিদ
তেওঁ লগতে কয় যে প্ৰায়বোৰ সৈনিক স্কুল বিজেপি আৰু আৰএছএছৰ সৈতে জড়িত লোকৰ হাতত গতাই দিবলৈ চুক্তি কৰা হৈছে। সেইবাবেই সৈনিক স্কুলসমূহ বেচৰকাৰীকৰণৰ প্ৰতিবাদ কৰিছে কংগ্ৰেছে।
কেন্দ্ৰীয় চৰকাৰে হিন্দুত্ববাদী সংগঠনৰ হাতত সৈনিক স্কুলসমূহ গতাই দিয়াৰ প্ৰস্তুতি আৰম্ভ কৰি দিছে। কিছুদিন ধৰি বিৰোধীয়ে এনে অভিযোগেই উত্থাপন কৰি আহিছে। বিশেষকৈ চিপিআইএমে এই অভিযোগক লৈ সৰৱ হৈছে।
লগতে পঢ়কঃ ইংৰাজৰ লগত হাত কোনে মিলাইছিল? নৰেন্দ্ৰ মোদীক তুলাধুনা দিলে ৰাহুল গান্ধীয়ে
দেশৰ মুঠ ৩৩খন সৈনিক স্কুল আছে। অষ্টম শ্ৰেণী উত্তীৰ্ণ ল’ৰা-ছোৱালীয়ে এই স্কুলসমূহত নামভৰ্তি কৰিব পাৰে। কেন্দ্ৰই এই স্কুলসমূহৰ সংখ্যা ১০০খনলৈ বৃদ্ধি কৰাৰ পৰিকল্পনা কৰিছে। সেয়ে সেইবোৰ বেচৰকাৰীকৰণ কৰিব পাৰে। কিন্তু বিৰোধীয়ে অভিযোগ কৰিলেও কেন্দ্ৰীয় চৰকাৰে এই সন্দৰ্ভত এতিয়ালৈকে কোনো মন্তব্য দিয়া নাই।
