গিৰিজানন্দ চৌধুৰী বিশ্ববিদ্যালয়, অসমৰ উদ্যোগত ২৯ আৰু ৩০ এপ্ৰিল, ২০২৪ তাৰিখে বিশ্ববিদ্যালয় চৌহদত জনগোষ্ঠীয় খাদ্য আৰু সাংস্কৃতিক মহোৎসৱ “এথন’ফেস্ট” অনুষ্ঠিত হয় । এই সাংস্কৃতিক মহোৎসৱৰ উদ্দেশ্য হৈছে আমাৰ জাতিৰ বৈচিত্ৰময় সংস্কৃতি আৰু পৰম্পৰাক পালন আৰু প্ৰদৰ্শন কৰা l এই উপলক্ষ্যে বিশ্ববিদ্যালয়ৰ চৌহদত আন্তঃমহাবিদ্যালয় পৰ্য্যায়ত লোক নৃত্য আৰু পৰম্পৰাগত লোক খাদ্য প্ৰতিযোগিতা অনুষ্ঠিত হয়।
২৯ এপ্ৰিল তাৰিখে অনুষ্ঠিত হোৱা দলীয় লোক নৃত্য প্ৰতিযোগিতাত অসমৰ বিভিন্ন ঠাইৰ পৰা ভালে সংখ্যক অংশগ্ৰহণকাৰী আহি যোগদান কৰে। প্ৰতিযোগিতাত প্ৰথম স্থান দখল কৰে পূজা দেৱীৰ দলে, লেইমা জাগই (মণিপুৰী নৃত্য)ৰ বাবে। মৌচুমী বৰাৰ দলে দ্বিতীয় স্থান লাভ কৰে বিহু নৃত্যৰ বাবে আৰু তৃতীয় স্থান লাভ কৰে দীনেশ গোৱালাৰ দলে বড়ো নৃত্যৰ বাবে।
৩০ এপ্ৰিল তাৰিখে পৰম্পৰাগত জনগোষ্ঠীয় খাদ্য প্ৰতিযোগিতা অনুষ্ঠিত হয়। বিশ্ববিদ্যালয়ৰ প্ৰাক্তন ছাত্ৰ প্ৰখ্যাত মাষ্টাৰচেফ ইণ্ডিয়া নয়নজ্যোতি শইকীয়াই এই খাদ্য প্ৰতিযোগিতাত বিচাৰক হিচাপে উপস্থিত থাকে । তেওঁ ৰন্ধন প্ৰতিযোগিতাৰ সমূহ প্ৰতিযোগীক এই বিশেষ কলাৰ গুৰুত্ব আৰু কৌশল সন্দৰ্ভত বক্তব্য ৰাখি সকলোকে উৎসাহিত কৰে। লগতে চেফ কুলিনাৰী স্কুলৰ প্ৰতিষ্ঠাপক চেফ অমিতাভ দত্তও বিচাৰক হিচাপে উপস্থিত থাকে। এই প্ৰতিযোগিতাত প্ৰথম স্থান লাভ কৰে অনিতা শইকীয়া কলিতাই বিশেষ ভাবে প্ৰস্তুত কৰা ভাপত দিয়া মাছৰ সুস্বাদু খাদ্যৰ বাবে।
তেনেদৰে সুস্বাদু খাদ্যৰ বাবে দ্বিতীয় আৰু তৃতীয় স্থান যথাক্ৰমে দখল কৰে দেৱী লতা পেগু আৰু জৰলিন তাৰপিয়ে । সান্দহ গুড়িৰে চিজ কেকৰ মিষ্টান্ন খাদ্যৰ বাবে প্ৰথম স্থান অধিকাৰ কৰে মম্পী দেৱীয়ে । দেবাঞ্জনী বৰুৱা আৰু বেদাৰ্চনা শৰ্মাই মিষ্টান্ খাদ্যৰ বাবে দ্বিতীয় আৰু তৃতীয় স্থান লাভ কৰে ।
দুদিনীয়াকৈ অনুষ্ঠিত হোৱা এই উৎসৱে জনগোষ্ঠীয় লোক সংগীত, শিল্প, খাদ্য আৰু পৰম্পৰাগত সাজ-পোছাক ইত্যাদি বাৰে ৰহণীয়া সংস্কৃতিৰে সম্বৃদ্ধ চহকী ঐতিহ্যক প্ৰদৰ্শিত কৰে। বিশ্ববিদ্যালয়ে লোৱা এই পদক্ষেপে কৃষ্টি সংস্কৃতিৰ উদযাপন , ৰক্ষণাবেক্ষণ আৰু বিনিময় কৰাৰ লগতে সকলোৰে মাজত এক সুন্দৰ স্মৃতি হিচাপে ৰৈ ৰৱ বুলি আশা কৰিছে ছাত্ৰ-ছাত্ৰী তথা কৰ্তৃপক্ষই।
