মাইবেলাস্থিত দাও ডিভিজনৰ সেনা আৰু আৰক্ষীৰ যুটীয়া অভিযানকাৰী এটা দলে আজি আলফা (স্বা)ৰ দুজন উগ্ৰপন্থী সদস্যক গ্ৰেপ্তাৰ কৰিবলৈ সক্ষম হয়। এটা গোপন সূত্ৰৰ পৰা পোৱা তথ্যৰ ভিত্তিতে অভিযানকাৰী দলটোৱে চৰাইদেউ জিলাৰ সোণাৰীৰ ডাইমণ্ড হোটেলৰ পৰা গ্ৰেপ্তাৰ কৰে উগ্ৰপন্থী দুজনক।
গ্ৰেপ্তাৰ হোৱা উগ্ৰপন্থী দুজন ক্ৰমে বৰহী গাঁৱৰ নিবাসী নিৰঞ্জন বৰগোহাঁই ওৰফে নিয়ন(২৮) আৰু মহামাৰা নিবাসী দুৰ্লভ কোঁৱৰ ওৰফে মুন(২৩) বুলি চিনাক্ত কৰা হৈছে।
সেনাৰ দলটোৱে ধৃত আলফা (স্বা) সদস্য দুজনৰ পৰা এটা ৯ এমএম পিষ্টল, এটা মেগজিন, ২ জাঁই সক্ৰিয় গুলী আৰু দুটা মোবাইল ফোন উদ্ধাৰ কৰে।
আটকাধীন সদস্য দুগৰাকীয়ে জেৰাৰ সন্মুখীন হোৱাত তেওঁলোকে ধন দাবী, অস্ত্ৰ সৰবৰাহ আৰু নতুন সদস্য ভৰ্তীত নিয়োজিত হৈ আছে বুলি স্বীকাৰোক্তি কৰে। পাছত দুয়োগৰাকী উগ্ৰপন্থী সদস্যকে সোণাৰী আৰক্ষীক গতাই দিয়ে।
উল্লেখ্য যে দীৰ্ঘদিন ধৰি বিদেশৰ মাটিৰ পৰা আলফা(স্বা)ৰ নিৰ্দেশত চৰাইদেউ জিলাৰ বিভিন্ন অঞ্চলত এই সদস্য দুগৰাকীয়ে অনৈতিক কাৰ্যকলাপ চলাই আহিছিল। এতিয়া এই সদস্য দুগৰাকীৰ গ্ৰেপ্তাৰে জিলাখনত শান্তি পৰিৱেশ ঘূৰি আহিব বুলি আৰক্ষীৰ লগতে সচেতন ৰাইজে ধাৰণা কৰিছে।
