ৰঞ্জীত দেহিয়া আৰু তেওঁৰ সহযোগী অসমৰ সঞ্জীব ৰয়ৰ দ্বাৰা শ্বিলঙৰ ৰাজপথত অনুষ্ঠিত কৰা ষ্ট্ৰীট আৰ্ট ফেষ্টিভেল প্ৰত্যক্ষ কৰি স্থানীয় শিল্পীসকল অনুপ্ৰাণিত হৈ মঙলবাৰে মেঘালয়ত এটা ফাইন আৰ্ট অনুষ্ঠান গঢ়ি তোলাৰ বাবে আহ্বান জনাইছে।
দেহিয়া হৈছে বলীউড আৰ্ট প্ৰজেক্টৰ এটা অংশ যিয়ে অভিতাভ বচ্চনৰ ৭৫ সংখ্যক জন্মদিনত তেওঁৰ এটা প্ৰতিকৃতি অংকন কৰিছিল। মুম্বাইত অংকন কৰা এই প্ৰতিকৃতিটো ভাৰতৰ আটাইতকৈ ওখ দেৱাল-চিত্ৰ হিচাপে পৰিগণিত হৈছে (ইয়াৰ উচ্চতা ২৩০ ফুট আৰু প্ৰস্থ ৩০ ফুট)।
শ্বিলং ষ্ট্ৰীট আৰ্ট ফেষ্ট-২০১৮ নামেৰে অভিহিতএই কলা মহোৎসৱত যোগদান কৰিছে ৰঞ্জীত দেহিয়াই। দেহিয়াই এসপ্তাহৰ পূৰ্বে আহি শ্বিলঙত বাহৰ পাতি আছে। তেওঁৰ সৈতে আছে নিজৰ প্ৰতিভাক সমাজৰ আগত প্ৰকাশ কৰিবলৈ বাট চাই থকা কেইগৰাকীমান স্থানীয় শিল্পী। কলাক এটা পেচা হিচাপে গ্ৰহণ কৰিব খোজা স্থানীয় শিল্পীসকলে ভ্ৰমণৰত এই শিল্পীদুগৰাকীৰ পৰা শিল্পৰ কলা –কৌশল আয়ত্ত কৰাৰ বাবেও আগ্ৰহী।
ভাৰতৰ ভিভিন্ন নগৰ মহানগৰৰ ৰাজপথ কলাকৃতি অংকন কৰা ৰঞ্জীত দেহিয়াই স্থানীয় যুৱচামৰ সৈতে মহানগৰৰ আলিয়ে গলিয়ে কলাকৃতি অংকন কৰাৰ কৌশলসমূহ বুজাই দিয়ে। তেওঁ শ্বিলঙৰ এটা চৰকাৰী অট্টালিকাত প্ৰবীন অভিনেতা মিথুন চক্ৰবৰ্তীৰ কলাকৃতি অংকন কৰিব।
‘ কেনণ্ট ষ্টপ আৰ্ট এণ্ড ক্ৰাফ্ট’ (Can’t Stop Art and Craft) গোট স্থাপন কৰা স্থানীয় শিল্পী অলিভাৰ ৱেণ্ডেল লিণ্ডেমে কয় যে তেওঁ আৰু তেওঁৰ সহযোগী শিল্পীসকলে দেহিয়াৰ পৰা কলাকৃতি অংকনৰ বিভিন্ন কৌশল আৰু শৈলী আয়ত্ব কৰিবলৈ সক্ষম হৈছে। তেওঁ কয় যে জোতা পলিছ কৰা ব্ৰাছেৰে কেনেদৰে কলাকৃতি অংকন কৰিব লাগে এই সকল অতিথি শিল্লীদুগৰাকীৰ পৰা তেওঁলোকে শিকিবলৈ সক্ষম হৈছে।
লিণ্ডেমৰ মতে ষ্ট্ৰীট আৰ্ট ফেষ্টিভেলে ১৫গৰাকী স্থানীয় শিল্পীক উপকৃত কৰিছে।
