উত্তৰ-পূবৰ সকলোবোৰ ৰেডিঅ’ ষ্টেইশ্যনক সংযোগ কৰিবলৈ আৰু এইবোৰৰ সকলো কাম অনলাইনত ৰাখিবৰ বাবে প্ৰস্তুত কৰা হৈছে এটা য়ুজাৰ ফ্ৰেইণ্ডলি ম’বাইল এপ্লিকেইশ্যন (এপ)। এই এপটো নিৰ্মাণ কৰিছে অল ইণ্ডিয়া ৰেডিঅ’, ক’হিমাৰ কেইজনমান ছ’ফটৱেৰ অভিযন্তাই।
এই সন্দৰ্ভত অল ইণ্ডিযা ৰেডিঅ’ৰ উপ সঞ্চালক প্ৰধান (ই) কে ভি ৰামাচন্দ্ৰনে কয় যে এপটো বৰ্তমান ক’হিমা ষ্টেইশ্যনত পৰীক্ষামূলক স্তৰত আছে। সম্পূৰ্ণ হ’লে ইয়াক সকলোবোৰ ষ্টেইশ্যনত ব্যৱহাৰ কৰা হ’ব।
মোককচাঙত দুদিনীয়াকৈ হোৱা উত্তৰ-পূবৰ মাণ্ডলিক সভাত ৰামচন্দ্ৰনে কয় যে অল ইণ্ডিযা ৰেডিঅ’ৰ সকলো ষ্টেইশ্যনে আন্তঃগাঁথনি আৰু কাৰিকৰী দিশত বাঞ্ছিত ধৰণৰ উন্নতি কৰিবলৈ হ’লে উপলব্ধ সা-সুবিধাবোৰৰ সৰ্বোত্তম ব্যৱহাৰ কৰা উচিত।
সভাখন অল ইণ্ডিযা ৰেডিঅ’ আৰু নৰ্থ-ইষ্ট জ’ন গুৱাহাটীৰ দূৰদৰ্শন কেন্দ্ৰৰ দ্বাৰা আয়োজন কৰা হৈছিল। ইয়াত ছিকিমকে ধৰি উত্তৰ-পূবৰ বিভিন্ন ঠাইৰ ২৬টা কেন্দ্ৰবোৰৰ শীৰ্ষ বিষয়াসকল উপস্থিত আছিল।
অল ইণ্ডিযা ৰেডিঅ’ৰ উত্তৰ-পূবৰ উপদেষ্টা ডি এন বসুমতাৰীয়ে কয় যে সভাখনত অঞ্চলটোৰ সকলো ৰেডিঅ’ ষ্টেইশ্যনৰ মাজত সংযোগ স্থাপন উন্নত কৰা আৰু অন্যান্য কিছুমান আনুষংগিক বিষয় আলোচনা কৰা হয়।
ইয়াত ষ্টেইশ্যনবোৰৰ পৰা প্ৰচাৰিত বিভিন্ন কাৰ্য্যসূচীবোৰৰ বিষয়েও আলোচনা কৰা হয়।
