এগৰাকী মহিলাই দাবী কৰিছিল যে এজন ব্যক্তিয়ে তেওঁক ৩০ বছৰ ধৰি ধৰ্ষণ কৰিছে। ধৰ্ষণৰ অভিযুক্তৰ বয়স বৰ্তমানৰ ৩০ বছৰ। এই বিষয়ত মহিলাগৰাকীয়ে বম্বে উচ্চ ন্যায়ালয়তো গোচৰ ৰুজু কৰে।
কিন্তু এতিয়া এই গোচৰ খাৰিজ কৰিছে বোম্বে উচ্চ ন্যায়ালয়ে। উচ্চ ন্যায়ালয়ে পৰ্যবেক্ষণ কৰে যে মহিলাগৰাকীয়ে কৰা দাবী সঁচা নহয়। দুয়োৰে মাজত প্ৰেমৰ সম্পৰ্ক আছিল।
১৯৮৭ চনৰ পৰা ২০১৭ চনলৈ মহিলাগৰাকীক ধৰ্ষণ কৰা হৈছিল বুলি ব্যক্তিগৰাকীৰ বিৰুদ্ধে ২০১৮ চনত গোচৰ ৰুজু কৰিছিল মহিলাগৰাকীয়ে।
মহিলাগৰাকীয়ে কয় যে ১৯৮৭ চনত তেওঁ সেই ব্যক্তিজনৰ কোম্পানীত যোগদান কৰিছিল। সেই সময়ৰ পৰাই অভিযুক্তই তেওঁক যৌন নিৰ্যাতন চলাইছিল। ইয়াৰ পিছত ৩০ বছৰ ধৰি তেওঁক বিভিন্ন হোটেল আৰু কটেজলৈ নি ধৰ্ষণ কৰা বুলি মহিলাগৰাকীয়ে দাবী কৰিছিল।
লগতে মহিলাগৰাকীয়ে আৰক্ষীক জনাইছিল যে ব্যক্তিজনে তেওঁক বিয়াৰ প্ৰতিশ্ৰুতি দিছিল।
মহিলাগৰাকীৰ মতে, যিহেতু ১৯৯৬ চনত ব্যক্তিজনৰ হাৰ্ট এটেক হৈছিল, সেয়েহে মহিলাগৰাকীয়ে কোম্পানীটোৰ দায়িত্ব লয় আৰু লগতে তেওঁৰ যত্ন লয়। ২০১৭ চনলৈকে এইদৰেই চলি আছিল। কিন্তু সেই বছৰ নিজৰ মাতৃ কেন্সাৰ ৰোগত আক্ৰান্ত হোৱাত তেওঁ কিছুদিনৰ বাবে ছুটী লৈছিল।
অভিযোগকাৰীৰ মতে, ছুটীৰ পিছত তেওঁ অফিচলৈ গৈ দেখিলে যে সকলো বন্ধ হৈ আছে। আনকি অভিযুক্তৰ ঘৰলৈ গৈয়ো লগ নাপালে অভিযুক্তক।
ইয়াৰ পিছতে মহিলাগৰাকীয়ে থানাত ব্যক্তিজনৰ বিৰুদ্ধে এফআইআৰ দাখিল কৰে।
সমগ্ৰ ঘটনাটোত আদালতে পৰ্যবেক্ষণ যে ইমান বছৰে দুয়োৰে মাজত যি শাৰীৰিক সম্পৰ্ক গঢ় লৈ উঠিছে সেয়া দুয়োৰে ইচ্ছাৰ বাবেই। ই কোনো কাৰণতে ধৰ্ষণ হ’ব নোৱাৰে।
আদালতে এই প্ৰশ্নও উত্থাপন কৰে, যদি ২০১৭ চনলৈকে এনেকুৱা হৈছিল তেন্তে এই আটাইবোৰ বছৰত তেওঁ কিয় কোনো অভিযোগ নকৰিলে? চাকৰি এৰি ২০১৮ চনত কিয় অভিযোগ কৰিছিল? ন্যায়াধীশগৰাকীয়ে অনুভৱ কৰে যে ৩১ বছৰৰ পাছত এনে অভিযোগ কৰি লাভ নাই।
