ভাৰতৰ প্ৰধানমন্ত্ৰী হিচাপে চাৰিটা দশকৰ অন্তত শেহতীয়াকৈ পোলেণ্ড ভ্ৰমণ কৰিছিল নৰেন্দ্ৰ মোদীয়ে। শান্তিৰ বাৰ্তা দিবলৈ যুদ্ধবিধ্বস্ত ইউক্ৰেইনলৈও গৈছিল মোদী। মোদীৰ বিমানখনে উভতি অহাৰ পথত পাকিস্তানৰ আকাশমাৰ্গ ব্যৱহাৰ কৰা বুলি খবৰ প্ৰকাশ পাইছে। এই ঘটনাত ইছলামবাদে ক্ষোভ প্ৰকাশ কৰে।
পাকিস্তানে অভিযোগ কৰিছে যে ভাৰতৰ প্ৰধানমন্ত্ৰীয়ে আকাশমাৰ্গ ব্যৱহাৰ কৰিও নিয়ম অনুসৰি ‘সদিচ্ছাৰ বাৰ্তা’ (গুড উইল মেচেজ) প্ৰেৰণ কৰা নাই।
সমগ্ৰ বিষয়টোক লৈ পাকিস্তানী সংবাদ মাধ্যমত সৰৱ চৰ্চা হৈছে। পাকিস্তানৰ বিমান পৰিবহণ মন্ত্ৰালয়ৰ তথ্য অনুসৰি মোদীৰ বিমানখন ভাৰতলৈ উভতি অহাৰ পথত পাকিস্তানৰ আকাশত মুঠ ৪৬ মিনিট সময় উৰা মাৰিছিল। পুৱা ১০:১৫ বজাৰ পৰা নিশা ১১:০০ বজালৈ মোডীৰ বিমানে পাকিস্তানৰ চিত্ৰাল, ইছলামবাদ আৰু লাহোৰৰ ওপৰেৰে উৰা মাৰি ভাৰতৰ অমৃতসৰৰ আকাশত প্ৰৱেশ কৰে।
ইছলামবাদে অভিযোগ কৰিছে যে ভাৰতৰ প্ৰধানমন্ত্ৰীয়ে পাকিস্তানৰ আকাশমাৰ্গ ব্যৱহাৰ কৰিছিল যদিও নিয়ম অনুসৰি ‘গুড উইল’ বাৰ্তা প্ৰেৰণ কৰা নাই। পাকিস্তান চৰকাৰে বিষয়টো ভালদৰে লোৱা নাই।
উল্লেখ্য যে বালাকোট বিমান আক্ৰমণৰ পিছত অৰ্থাৎ ২০১৯ চনৰ ২৬ ফেব্ৰুৱাৰীৰ পৰা পাকিস্তানে ভাৰতীয় বিমানৰ বাবে আকাশমাৰ্গ সম্পূৰ্ণৰূপে বন্ধ কৰি দিছিল। কিন্তু দুবছৰৰ পাছত পাকিস্তানে ভাৰতীয় বাণিজ্যিক বিমানৰ বাবে আকাশমাৰ্গ মুকলি কৰি দিয়ে। তেতিয়াৰ পৰাই ভাৰতীয় বাণিজ্যিক বিমান সংস্থাসমূহে আমেৰিকালৈ পোনপটীয়া বিমান সেৱাৰ বাবে পাকিস্তানৰ আকাশমাৰ্গ ব্যৱহাৰ কৰি আহিছে। কিন্তু সম্পৰ্কত যি তিক্ততা ভৰি আছে সেয়া শেহতীয়া ঘটনাত পুনৰ উমান পোৱা গৈছে।
