৬ টা মাহৰ কাৰাবাসৰ অন্তত অৱশেষত সকাহ পালে কেজৰিৱালে। শুকুৰবাৰে পুৱা আবকাৰী দুৰ্নীতিৰ গোচৰত উচ্চতম ন্যায়ালয়ে দিল্লীৰ মুখ্যমন্ত্ৰী অৰবিন্দ কেজৰিৱালক জামিন মঞ্জুৰ কৰে। ইডিৰ পিছত চিবিআইয়ে দাখিল কৰা গোচৰতো তেওঁক মুকলি কৰি দিয়া হয়। ইয়াৰ পিছতে বিজেপিয়ে আপৰ শীৰ্ষ নেতাগৰাকীৰ পদত্যাগৰ দাবী জনায়।
শুকুৰবাৰে সংবাদমেল সম্বোধন কৰি বিজেপিৰ মুখপাত্ৰ গৌৰৱ ভাটিয়াই ‘নৈতিকতা’ৰ বিষয়টো মনত ৰাখি অন্ততঃ দিল্লীৰ মুখ্যমন্ত্ৰীৰ পদৰ পৰা অনতিপলমে পদত্যাগ কৰিব লাগে বুলি কয়। গৌৰৱে কেজৰিৱালক ‘জেল ৱালাৰ মুখ্যমন্ত্ৰীৰ পৰা বেল ৱালা মুখ্যমন্ত্ৰীলৈ’ বুলিও ঠাট্টা কৰে। তেওঁৰ কটুক্তিৰ পিছতে দিল্লীবাসীয়ে কেজৰিৱালক আবকাৰী গোচৰত গ্ৰেপ্তাৰ কৰাৰ পিছত তেওঁৰ পদত্যাগৰ দাবী জনায়। সেই কথা মনত ৰাখি দিল্লীৰ মুখ্যমন্ত্ৰীয়ে পদত্যাগ কৰিব লাগে।
কিন্তু গৌৰৱ ইয়াতেই থমকি ৰোৱা নাই। অৰবিন্দ কেজৰিৱালক ‘দুৰ্নীতিগ্ৰস্ত মুখ্যমন্ত্ৰী’ আখ্যা দি তেওঁ দাবী কৰে যে কেজৰিয়ে সকলো ধ্বংস কৰি দিল্লীৰ মুখ্যমন্ত্ৰীৰ চকী দখল কৰিছে।
অৰবিন্দ কেজৰিৱাল আৰু আম আদমি পাৰ্টিৰ কোনো নৈতিক চৰিত্ৰ নাই, দিল্লী বিজেপিৰ মুৰব্বী বীৰেন্দ্ৰ সচদেৱে কেজৰিৱালৰ শীঘ্ৰে পদত্যাগ দাবী কৰে। ইয়াৰ পিছতে বীৰেন্দ্ৰ সচদেৱে কয় যে উচ্চতম ন্যায়ালয়ে স্পষ্ট কৰি দিছে যে দিল্লীৰ মুখ্যমন্ত্ৰীক গ্ৰেপ্তাৰ কৰাত কোনো অন্যায় হোৱা নাছিল।
ইফালে কেজৰিৱাল জেলৰ পৰা মুক্তি পোৱাৰ লগে লগে দিল্লীত আৰম্ভ হৈছে উদযাপন। আম আদমি পাৰ্টিৰ মুখ্য কাৰ্যালয়তো ফুল আৰু মালাৰে সজাই তোলা হৈছে।
