বৃহস্পতিবাৰে অসম তথা অসমবাসীৰ বাবে আহিল এটা বহু প্ৰত্যাশিত খৱৰ। অসমৰ ইতিহাসত অসমীয়া ভাষাৰ বাবে এক নতুন মাইলৰ খুটি স্থাপন হ’ল। অসমীয়া ভাষাক ধ্ৰুপদী ভাষাৰ মৰ্যাদা প্ৰদানত কেন্দ্ৰীয় কেবিনেটে অনুমোদন জনালে।
অসমীয়াৰ লগতে দেশৰ ৫টা ভাষাক কেন্দ্ৰীয় কেবিনেটে ধ্ৰুপদী ভাষাৰ স্বীকৃতি প্ৰদান কৰিলে। এই ভাষাকেইটা হৈছে- অসমীয়া, মাৰাঠী, পালি, প্ৰাকৃত আৰু বাংলা ভাষা।
ইয়াৰ পূৰ্বে দেশৰ ৬টা ভাষাক ধ্ৰুপদী ভাষাৰ মৰ্যাদা প্ৰদান কৰা হৈছিল। পূৰ্বে স্বীকৃতিপ্ৰাপ্ত ভাৰতৰ ধ্ৰুপদী ভাষা কেইটা হৈছে- তামিল, সংস্কৃত, কানাড়া, তেলেগু, মালায়লম আৰু ওড়িয়া। এতিয়াৰে পৰা ভাৰতৰ ধ্ৰুপদী ভাষাৰ স্বীকৃতি পোৱা ভাষাৰ সংখ্যা হ’ল মুঠ ১১টা।
উল্লেখ যে ২০২১ চনত অসম সাহিত্য সভাৰ প্ৰাক্তন সভাপতি কুলধৰ শইকীয়াৰ উদ্যোগত প্ৰস্তুত কৰা ৩৯৪ পৃষ্ঠাৰ প্ৰতিবেদনৰ ভিত্তিত তথা আন বহু লোকৰ আশাশুধীয়া প্ৰচেষ্টাত অসমীয়া ভাষাই এই মৰ্যাদা লাভ কৰিলে। এতিয়া অসমীয়া ভাষা পোন্ধৰশ বছৰৰো আগৰ এক সমৃদ্ধ তথা স্বকীয় ভাষা হিচাপে স্বীকৃত হ’ল।
স্বাভাৱিকতে বিভিন্ন সময়ত অসমীয়া ভাষাকলৈ সৃষ্টি হোৱা শংকা-সংশয় বহুখিনি দূৰ হ’ল বুলি ক’ব পাৰি। কিন্তু এই স্বস্তি ভাষাটোৰ শেষ অৱস্থান নহয়। বৰঞ্চ ই এতিয়া নতুন ৰূপত আৰু অধিক বিকশিত হোৱাৰ অপেক্ষা ৰাখে। অসমীয়া ভাষাৰ বাবে শ্বহীদ হোৱা সেই ব্যক্তিসকললৈও এই ছেগতে মনত পেলোৱা উচিত।
সাংবিধানিকভাৱে স্বীকৃতিৰ সমান্তৰালকৈ বৌদ্ধিক উত্তৰণৰ মাজেৰে ভাষাটোক কেনেকৈ অধিক সমৃদ্ধ কৰি তুলিব পাৰি সেইটোৱে হ’ব ভৱিষ্যতৰ কৰণীয়। অৱশ্যে সৃষ্টিমূলক ৰচনা, গৱেষণা আদিৰ জৰিয়তে বিশ্বত ভাষাটোৰ মৰ্যাদা প্ৰতিষ্ঠাৰ বাবে এটা নতুন বাট কটা হ’ল। এই স্বীকৃতিয়ে আজি অসমীয়া জাতিটোক দিয়া উৎসাহ-প্ৰেৰণাই অসমীয়াৰ মনত জাতীয়বাদৰ ভেটি সুদৃঢ় কৰিব বুলিয়েই আশা কৰিব পাৰি। এতিয়া এই স্বীকৃতিৰ সমান্তৰালকৈ অসমীয়া ভাষাই ইউনিকোডতো স্বকীয় ভাষা হিচাপে স্বীকৃত হোৱাৰ দাবীয়ে নিশ্চয় গুৰুত্ব লাভ কৰিব!
