দুৰ্বৃত্তই গুলীয়াই হত্যা কৰিলে এজন ২৬ বছৰীয়া ভাৰতীয় যুৱকক। সোমবাৰে পুৱা আমেৰিকাৰ ৱাশ্বিংটনৰ এটা গেছ ষ্টেচনত এটা অপৰাধীৰ দলে যুৱকজনক আক্ৰমণ কৰে।
জানিব পৰা মতে যুৱকজনৰ নাম ৰবি তেজা আৰু তেওঁৰ ঘৰ হায়দৰাবাদত। হায়দৰাবাদৰ আৰ কে পুৰম কলনীৰ বাসিন্দা ৰবি ২০২২ চনত স্নাতকোত্তৰ ডিগ্ৰীৰ বাবে আমেৰিকালৈ গৈছিল। পঢ়া-শুনা শেষ কৰি তাতে চাকৰি বিচাৰি আছিল।
উল্লেখ্য যে আমেৰিকাত ভাৰতীয় যুৱকক হত্যা কৰা ঘটনা এয়া নতুন নহয়, ইয়াৰ পূৰ্বে ভাৰতীয় মূলৰ এজন ৬৬ বছৰীয়া ব্যক্তিক দুষ্কৃতিকাৰীয়ে গুলীয়াই হত্যা কৰিছিল।
জানিব পৰা মতে, গেছ ষ্টেচনত ডকাইতিৰ বাবে বন্দুক লৈ তিনিজন দুষ্কৃতিকাৰীয়ে আক্ৰমণ চলাইছিল। তাতে দুষ্কৃতিকাৰীয়ে গুলীয়াই হত্যা কৰে পেট্ৰ’ শিৱৰাম নামৰ গেছ ষ্টেচনৰ এজন কৰ্মীক।
কিন্তু ৰবি কিয় হত্যা কৰা হ’ল সেই কথা জানিবলৈ আৰম্ভ হৈছে তদন্ত। মুখত কাপোৰ বান্ধি ৰখাৰ বাবে দোষীক চিনাক্ত কৰিব পৰা নগ’ল বুলি আৰক্ষীয়ে জানিবলৈ দিয়ে। গেছ ষ্টেচনৰ আন কৰ্মচাৰীক জেৰা কৰিছে আৰক্ষীয়ে। তদুপৰি হায়দৰাবাদৰ দুষ্কৃতিকাৰীৰ লগত যুৱকজনৰ কিবা শত্ৰুতা আছিল নেকি তাৰো তদন্ত চলি আছে। উল্লেখ্য যে বহু ভাৰতীয়ই আমেৰিকাত বিভিন্ন পেট্ৰ’ল আৰু গেছ ষ্টেচনত কাম কৰে। তদন্তকাৰীয়ে জানিবলৈ চেষ্টা চলাইছে যে যুৱকজনে শিক্ষা সমাপ্ত কৰি তাত কাম কৰিছিল নেকি। ইতিমধ্যে যুৱকজনৰ পৰিয়ালক খবৰ দিয়া হৈছে।
